ԵՐԵՎԱՆ, 1 հուլիսի – Sputnik. ՀՀ ԱԺ արտահերթ նիստում քննարկվում է «Հայաստան» խմբակցության պատգամավոր Իշխան Սաղաթելյանին ԱԺ փոխնախագահի պաշտոնից հետ կանչելու հարցը։
Նախագիծը խորհրդարանին է ներկայացնում «Քաղաքացիական պայմանագիր» խմբակցության պատգամավոր Արուսյակ Ջուլհակյանը։
Նա հիշեցրեց, որ Սաղաթելյանն ԱԺ փոխնախագահի պաշտոնում ընտրվել է 2021թ-ի օգոստոսի 6-ին։ Քաղաքացիական պայմանագիրը կողմ է քվեարկել, իր բնորոշմամբ` «հարգելով ՀՀ քաղաքացիների ընտրությունը և ի գիտություն ընդունելով ՀՀ Սահմանադրության 104 հոդվածի առաջին մասը, որի համաձայն` նախագահի տեղակալներից մեկն ընտրվում է ընդդիմադիր խմբակցությունների կազմում ընդգրկված պատգամավորներից»։
Ջուլհակյանը նշեց, որ օրենքով ԱԺ նախագահի տեղակալի պաշտոնից հետկանչն իրականացվում է ԱԺ գաղտնի քվեարկությամբ։
Միևնույն ժամանակ նա նաև շեշտեց, որ ո՛չ ՀՀ Սահմանադրությամբ, ո՛չ ԱԺ կանոնակարգ օրենքով հետկանչի իրավական հիմքերը սահմանված չեն։Նրա մեկնաբանմամբ` այդ հարցը թողնվել է ԱԺ խմբակցությունների քաղաքական որոշումների տիրույթում։
Այդուհանդերձ, զեկուցողը նաև Սաղաթելյանի պաշտոնանկության որոշ հիմքեր ներկայացրեց։
«ԱԺ կանոնակարգ սահմանադրական օրենքի 4-րդ մասի 2-րդ կետի համաձայն` ԱԺ պատգամավորը պարտավոր է մասնակցել ԱԺ և իր անդամակցած հանձնաժողովի ու աշխատանքային խմբերի նիստերին։ Այնինչ, Իշխան Սաղաթելյանը 2022թ-ի հունվարի 17-ից առ հունիսի 29-ը ներառյալ, 342 քվեարկություններից ունեցել է 198 բացակա»,- ասաց նա` հավելելով, որ ԱԺ փոխնախագահները նույն օրենքով պարտավոր են մասնակցել նաև ԱԺ խորհրդի նիստերին, մինչդեռ խորհրդի 25 նիստերից Սաղաթելյանը ներկա է եղել միայն 7-ին։
Ջուլհակյանը շեշտեց նաև, որ Իշխան Սաղաթելյանը մայիս-հունիս ամիսներին առաջնորդել է ընդդիմության բողոքի ակցիաները` այդ ընթացքում բախումներ հրահրելով, վիրավորական արտահայտություններով ու բռնության կոչերով հանդես գալով։ Դրանցից մի քանիսը նա մեջբերեց ԱԺ ամբիոնից։
Նշենք, որ ԱԺ արտահերթ նիստը գումարվել է «Քաղաքացիական պայմանագրի» նախաձեռնությամբ։
Իշխան Սաղաթելյանի հարցից բացի, նիստի օրակարգում է նաև ԱԺ «Հայաստան» խմբակցության պատգամավոր Վահե Հակոբյանի` Տնտեսական հարցրի մշտական հանձնաժողովի նախագահի լիազորությունները դադարեցնելու հարցը։
Նշենք, որ ընդդիմությունը նիստին չի մասնակցում։ Իսկ ՔՊ 71 պատգամավորնրից նիստին գրանցվել են 59-ը։