ԵՐԵՎԱՆ, 30 հունիսի – Sputnik. Մեծ Բրիտանիայի վարչապետ Բորիս Ջոնսոնը մի շարք հայտարարություններ է անում, որոնց մի մասի բովանդակությունը սարսափելի է։ Ինչպես հայտնում է ՌԻԱ Նովոստին, այս տեսակետը հայտնել է ՌԴ նախագահի մամուլի քարտուղար Դմիտրի Պեսկովը։
«Գիտեք, որ պարոն Ջոնսոնը մի շարք արտահայտություններ և հայտարարություններ է թույլ տալիս` իրենց բովանդակությամբ հաջող, ոչ այնքան հաջող, բոլորովին անհաջող և սարսափելի», – ասել է Պեսկովը` մեկնաբանելով G20 գագաթնաժողովը բոյկոտելու Ջոնսոնի կոչն ու այն հայտարարությունը, որ ինքը կապշի, եթե Պուտինն անձամբ ժամանի։
Պեսկովը շեշտել է, որ նման հայտարարությունները չեն ազդի Կրեմլի որոշման վրա։
Ավելի վաղ ՌԴ նախագահի օգնական Յուրի Ուշակովը հայտարարել էր, որ Պուտինը G20–ի գագաթնաժողովին մասնակցելու հրավեր է ստացել Ինդոնեզիայի նախագահ Ջոկո Վիդոդոյից։ Միաժամանակ նա ասել էր, որ վերջնական որոշում դեռ չի կայացվել, թե ինչ մակարդակով ՌԴ–ն կմասնակցի գագաթնաժողովին։