ԵՐԵՎԱՆ, 30 հունիսի – Sputnik. Բարձրագույն դատական խորհրդի նախագահի պաշտոնակատար Գագիկ Ջհանգիրյանը կարգապահական պատասխանատվության չի ենթարկվի. վարույթի հարուցումը մերժվել է։ Տեղեկությունը ֆեյսբուքյան էջում հայտնել է ԲԴԽ մամուլի քարտուղար Լիլիթ Շաբոյանը։
Նման որոշում է կայացրել ԲԴԽ անդամներ Գրիգոր Բեքմեզյանի, Դավիթ Խաչատուրյանի, Մեսրոպ Մակյանի, Անի Մխիթարյանի և Սերգեյ Չիչոյանի անդամակցությամբ ձևավորված հանձնախումբը։
«Հանձնաժողովը համարել է, որ ձայնագրությունը մոնտաժված է, այդպիսով դրա հիման վրա անհնար է սկսել դատավորի կամ Բարձրագույն դատական խորհրդի անդամի նկատմամբ կարգապահական վարույթի հարուցում։ Հանձնաժողովն արձանագրել է նաև, որ բաց է թողնված կարգապահական վարույթի հարուցման`օրենքով նախատեսված մեկ տարվա ժամկետը»,– գրել է Շաբոյանը։
Նշվում է, որ Ռուբեն Վարդազարյանը (որպես ԲԴԽ նախագահ լիազորությունները դադարեցված են) 2021թ. փետրվարի 20-ին կատարված ձայնագրությունը հրապարակել է միայն 2022թ. հունիսի 20-ին՝ ենթադրյալ խախտումը կատարելուց մեկ տարի 4 ամիս անց։
Հիշեցնենք, որ հունիսի 20-ին հրավիրված ասուլիսում հրապարակվել է ԲԴԽ նախագահի պարտականությունները կատարող Գագիկ Ջհանգիրյանի հետ ունեցած զրույցի ձայնագրությունը, որում մի շարք հետաքրքիր դրվագներ են բացվում՝ կապված դատական համակարգի վրա ճնշումներ գործադրելու հետ։
Անցած տարվա փետրվարին արված գաղտնի ձայնագրությունում Գագիկ Ջհանգիրյանը հորդորում է այն ժամանակ դեռ ԲԴԽ նախագահի պաշտոնը զբաղեցնող Ռուբեն Վարդազարյանին հրաժարական տալ և խոսում է քրեական գործերի ընթացքին միջամտելու մասին։