«Ես խղճում եմ իշխող ուժին». Սաղաթելյանը` պաշտոնից հեռացվելու որոշման մասին

Իշխան Սաղաթելյանի համար ԱԺ փոխնախագահի պաշտոնից ազատվելը երկրորդական հարց է։ Նա իր տեսակետը հայտեց Sputnik Արմենիայի հետ զրույցում։

Հունիսի 28-ին հայտնի դարձավ, որ «Քաղաքացիական պայմանագիր» խմբակցությունը որոշել է Ազգային ժողովի նախագահի տեղակալի պաշտոնից հեռացնել «Հայաստան» խմբակցությունը ներկայացնող Իշխան Սաղաթելյանին։

Սաղաթելյանի խոսքով` նման որոշումներով որևէ կերպ չեն կարող իրենց գործունեությունը կաշկանդել։

«Դրանով փորձում են ինչ-որ բան ցույց տալ, բայց այսօրվա դավաճան իշխանության կողմից հետապնդվելը, բանտարկվելը, ճնշումների ենթարկվելը մեզ պատիվ է բերում, որովհետև երկրի ղեկին հայտնվել է մի խմբակ, որը հետևողականորեն երկիրը տանում է դեպի անդունդ»,- շեշտեց ԱԺ նախագահի տեղակալը։

Ըստ Սաղաթելյանի` իր և Վահե Հակոբյանի պաշտոնանկության հարցերը «Հայաստան» խմբակցությունում նույնիսկ չեն էլ քննարկվել։

ԱԺ փոխնախագահը ևս մեկ անգամ հավաստիացրեց, որ պատգամավորական մանդատները վայր չեն դնելու, որովհետև իրենց ընտրել են ՀՀ քաղաքացիները շատ հստակ ուղերձով` երկիրը դուրս բերել ստեղծված իրավիճակից ու հեռացնել գործող իշխանությանը, հետևաբար, մանդատը պետք է բացառապես ծառայի ժողովրդական օրակարգին, որը ձևավորվել է փողոցում։

Հիշեցնենք` հունիսի 27-ին ՀՀ վարչապետ Նիկոլ Փաշինյանն առցանց ասուլիսում ասել է, որ «Քաղաքացիական պայմանագիր» խմբակցությունում «Հայաստան» և «Պատիվ ունեմ» խմբակցությունների պատգամավորների բացակայությունների թույլատրելի սահմանը հատելու վերաբերյալ որոշում դեռ չկա։ Նա հիշեցրել է, որ ՀՀ օրենսդրությամբ և Սահմանադրությամբ գոյություն ունի ԱԺ պատգամավորին մանդատից զրկելու կարգ, ինչի հիմքում դրված է 1 նստաշրջանում քվեարկությունների կեսից ավելիից բացակայելը։ Ըստ Փաշինյանի` եթե ընդդիմադիր պատգամավորներին մանդատներից զրկելու վերաբերյալ ԱԺ խորհուրդը որոշում կայացնի, ապա հարկ կլինի դիմել ՍԴ` վերջնական որոշում կայացնելու համար։

Մայիսի 1-ից, երբ մայրաքաղաքում սկսվեցին «Դիմադրություն» շարժման բողոքի ակցիաները, ընդդիմադիր պատգամավորները գրեթե չեն մասնակցել ԱԺ նիստերին։