ԵՐԵՎԱՆ, 29 հունիսի – Sputnik. Ուկրաինացի ազգայնականներն ուզում են այրել ԴԺՀ–ի Ավդեևկա քաղաքը խաղաղ բնակիչների հետ միասին։ Այս մասին այսօր հայտարարել է ՌԴ պաշտպանական վարչության ազգային կենտրոնի պետ, գեներալ–գնդապետ Միխայիլ Միզինցևը։
«Ազգայնականների և օտարերկրյա վարձկանների գաղտնալսված ռադիոբանակցություններից հստակ պարզ է դարձել, որ գրոհայինները ՌԴ ԶՈւ–ի և ԴԺՀ–ի զորամիավորումների` Ավդեևկային մոտենալու ժամանակ, կրկօրինակելով Հայրենական մեծ պատերազմի տարիներին նացիստների կողմից կիրառվող «այրված հողի» մարտավարությունը, մտադիր են վերացնել քաղաքը», – ասել է Միզինիցևը։
Նրա խոսքով` ուկրաինական կողմի նման գործողությունների նպատակը ՌԴ ԶՈւ–ին քաղաքացիական ենթակառուցվածքներին հասցվող անկանոն հարվածներում մեղադրելն է, հետագայում ուկրաինական և արևմտյան մամուլում այդ ամենի լայն լուսաբանմամբ։
Միզինցևը հայտնել է նաև, որ ուկրաինական ազգային գումարտակների անդամները հենակետեր և կրակակետեր, ինչպես նաև հրետանի են տեղակայել Կրամատորսկի դպրոցի և մանկապարտեզի մատույցներում։
Նա նշել է, որ նույն կերպ ուկրաինացի զինվորականները վարվել են նաև Օդեսայում, որտեղ Եկատերինինսկայա փողոցի բնակելի տների վերևի հարկերում կրակակետեր և դիպուկահարների համար նախատեսված կետեր են կահավորել։ Միզինցևի փոխանցմամբ` տեղի բնակիչներին բնակարաններից չեն տարհանել և, փաստորեն, նրանց որպես «կենդանի վահան» են օգտագործում։
Ճեպազրույցի ժամանակ տվյալներ են հրապարակվել նաև խաղաղ բնակիչների տարհանման վերաբերյալ։ ՌԴ ՊՆ–ի տվյալներով` մեկ օրում ավելի քան 19.5 հազար մարդ է տարհանվել Ռուսաստան Ուկրաինայից և Դոնբասից։
«Չնայած Կիևի ռեժիմի ստեղծած բոլոր դժվարություններին, անցած մեկ օրվա ընթացքում առանց Ուկրաինայի իշխանությունների մասնակցության Դոնբասի հանրապետություններից և Ուկրաինայի տարածքից ՌԴ է տարհանվել 19 650 մարդ, այդ թվում` 3259 երեխա, իսկ ռազմական հատուկ գործողությունների մեկնարկից ի վեր` 2 190 202 մարդ, որից 346 595–ը` երեխա», – հայտնել է Միզինցևը։
Ռուսական բանակն այսօր ԴԺՀ–ում, Խերսոնի, Զապորոժիեի և Խարկովի մարզերում մարդասիրական 5 ակցիա է իրականացրել, որի ընթացքում խաղաղ բնակիչներին 381 տոննա օգնություն է հասցվել։
ՌԴ ՊՆ–ի տվյալներով` ՌԴ ԱԻՆ և ԶՈւ ականազերծման ջոկատները հատուկ գործողությունների ողջ ընթացքում 3642,24 հա տարածք են ստուգել, վնասազերծել 40 651 պայթյունավտանգ առարկա։
Հիշեցնենք` փետրվարի 24-ի վաղ առավոտյան Ռուսաստանի նախագահ Վլադիմիր Պուտինը հայտարարեց, որ Ուկրաինայի նկատմամբ հատուկ ռազմական գործողության մասին որոշում է կայացրել, քանի որ ԼԺՀ-ն ու ԴԺՀ-ն դիմել են օգնության խնդրանքով։
Ուկրաինայում մարտական գործողությունները շարունակվում են արդեն 126-րդ օրը։