ԵՐԵՎԱՆ, 28 հունիսի – Sputnik. Թուրքական Baykar Makina ընկերությունը հայտարարել է Ուկրաինային անվճար երեք «Բայրաքթար TB2» ԱԹՍ փոխանցելու մտադրության մասին։ Այս մասին տեղեկանում ենք Twitter–ում ընկերության էջից։
«Գործարարներն ու հասարակ մարդիկ մի քանի օր շարունակ մեծ ու փոքր գումարներ են փոխանցել այդ նպատակին հասնելու համար։ Baykar ընկերությունը TB2–ների համար գումար չի վերցնելու և անվճար կուղարկի երեք անօդաչուները ուկրաինական ճակատ», – գրված է հաղորդագրության մեջ։
Նախորդ շաբաթ Թուրքիայի նախագահի վարչակազմի պաշտպանական արդյունաբերության վարչության ղեկավար Իսմայիլ Դեմիրը հայտարարել էր, որ երկիրը մեծ զգուշավորություն է դրսևորում Ուկրաինային զենք մատակարարելու հարցում։ Հարցին, թե արդյոք Թուրքիան շարունակում է զենք, մասնավորապես Bayraktar TB-2–ներ ուղարկել Ուկրաինային, Դեմիրն ասել էր, որ «ինչ–որ բան տեղի է ունենում»։
Ավելի վաղ ՌԴ–ն բոլոր երկրներին նոտա էր հղել Ուկրաինային սպառազինություն մատակարարելու պատճառով։ ՌԴ ԱԳՆ ղեկավար Սերգեյ Լավրովը նշել էր, որ ցանկացած բեռ, որում Ուկրաինայի համար զենք կա, Ռուսաստանի համար օրինական թիրախ է հանդիսանալու։
Հիշեցնենք` փետրվարի 24-ի վաղ առավոտյան Ռուսաստանի նախագահ Վլադիմիր Պուտինը հայտարարեց, որ Ուկրաինայի նկատմամբ հատուկ ռազմական գործողության մասին որոշում է կայացրել, քանի որ ԼԺՀ-ն ու ԴԺՀ-ն դիմել են օգնության խնդրանքով։
Ուկրաինայում մարտական գործողությունները շարունակվում են արդեն 125-րդ օրը։