ԵՐԵՎԱՆ, 28 հունիսի – Sputnik. Ծնվել է Արցախյան 44-օրյա պատերազմում զոհված Գևորգ և Կարեն Գևորգյանների եղբայրը: Բժիշկ, գինեկոլոգ-ռեպրոդուկտոլոգ Անուշ Աբրահամյանը ֆեյսբուքյան իր էջում լուսանկար է հրապարակել` շնորհակալություն հայտնելով «Էրեբունի» ԲԿ-ի ամբողջ անձնակազմին։
«Կյանք տվեց բոլորին էս փոքրիկը»,- գրել է Աբրահամյանը։
Ծնվել է 44-օրյա պատերազմում զոհված Գևորգ և Կարեն Գևորգյանների եղբայրը
Նշենք, որ Sputnik Արմենիան անդրադարձել էր Գևորգ և Կարեն Գևորգյանների եղբայրների պատմությանը։ Գևորգն ու Կարենը ծառայում էին ոստիկանության զորքերում։ Ավագ եղբայրը 26 տարեկան էր, կրտսերը` 22։ Նրանք Արցախ էին մեկնել պատերազմի առաջին օրը։ Սկզբում ծառայում էին Քարվաճառում, բայց նոյեմբերի սկզբին նրանց տեղափոխել էին Շուշի։ Ընկերներն ու հրամանատարները համոզել էին իրարից առանձին մեկնել առաջնագիծ, բայց ոչինչ չէր ստացվել։
Տղաների մայրը` տիկին Արևիկը, Sputnik Արմենիային պատմել էր, որ երբ ադրբեջանցիներն արդեն Շուշի էին մտել, Կարենն այնտեղ էր, իսկ Գևորգը` քաղաքի մատույցներում։ Գևորգին ասել են, որ Կարենը վիրավոր է, և նրան չեն կարողանում դուրս բերել։ Գևորգն էլ գնացել է եղբորը փրկելու, թեև շատ լավ հասկացել է, որ ողջ չի մնալու։ Հրադադարից հետո գտել են տղաների մարմինները` կողք կողքի պառկած։
Գևորգն ամուսնացած էր, դուստրն արդեն 2 տարեկան է։ Տիկին Արևիկի խոսքով` ուզում էր երկու որդի ունենալ, իսկ Կարենը պատերազմի ժամանակ որոշել էր ամուսնանալ. եղբոր կնոջը խնդրել էր հարսնացու գտնել, մինչև ինքը կվերադառնա...