ԵՐԵՎԱՆ, 28 հունիսի – Sputnik. «Իշխանական կուլիսներում քննարկում են մինչև տարեվերջ Երևանի արտահերթ ընտրություններ անցկացնելու հարցը։ Այս մասին գրում է «Հրապարակ» թերթը։
Օրերս հայտնի էր դարձել, որ շրջանառության մեջ է դրվել օրենսդրական նոր նախագիծ, որը հնարավորություն կտա ավագանուն ինքնալուծարվելու որոշում կայացնել։
«Այս շտապողականությունը մի քանի բացատրություն ունի․ ժամանակն իրենց օգտին չի խոսում, չեն ուզում հերթական ընտրություններին գնալ, որ ընդդիմությունը պատրաստվելու ժամանակ չունենա: Բացի այդ` արտաքին գործընթացները, օրինակ` խաղաղության պայմանագրի ստորագրումը, չեն կարող շատ ձգել, իսկ ցանկացած փաստաթղթի ստորագրում կնվազեցնի իշխանության վարկանիշը»,–գրում է «Հրապարակը»։
Թերթը գրում է` իշխանությունը հույս ունի, որ Տիգրան Ավինյանը ՔՊ-ի հետ ամենաքիչ ասոցացվող թեկնածուներից է, և նրա կողմից Երևանի ավագանու ցուցակը գլխավորելը կնվազեցնի պարտության հավանականությունը:
Հիշեցնենք` մարտի վերջին ՔՊ հանրային կապերի համակարգող Վահագն Ալեքսանյանը Sputnik Արմենիայի հետ զրույցում հայտարարեց, որ Երևանի առաջիկա ՏԻՄ ընտրություններում «Քաղաքացիական կուսակցության» ցուցակը գլխավորելու է Տիգրան Ավինյանը։
Ավինյանը 2018 թվականի մայիսից մինչև 2021 թվականի օգոստոսը ՀՀ փոխվարչապետն էր։
Դրանից հետո նա նշանակվեց Հայաստանի պետական հետաքրքրությունների ֆոնդի (ANIF) տնօրենների խորհրդի նախագահ։
2022–ից Ավինյանը «Հայբիզնեսբանկի» տնօրենների խորհրդի անդամ է, «Հայաստանի ազգային պոլիտեխնիկական համալսարան» հիմնադրամի հոգաբարձուների խորհրդի նախագահ։
Նշենք, որ Երևանի ավագանու ընտրությունները նախատեսված են 2023 թվականին։