ԵՐԵՎԱՆ, 27 հունիսի – Sputnik. Ուկրաինայի նախագահ Վլադիմիր Զելենսկին G7-ի առաջնորդներին ասել է, որ Ռուսաստանի հետ բանակցությունների ժամանակը դեռ չի եկել, և որ Ուկրաինան նախ պետք է ամրապնդի իր դիրքերը։ Տեղեկությունը հայտնում է «Ֆրանս Պրեսը»` հղում անելով Ելիսեյան պալատին։
«Նախագահ Զելենսկին բոլորին շատ հստակ պատասխան տվեց` ասելով, որ այժմ բանակցությունների ժամանակը չէ: Ուկրաինան կմտնի բանակցությունների մեջ, երբ կարողանա ներկայանալ ուժեղ դիրքերից»,- լրատվամիջոցներին ասել են Ելիսեյան պալատում։
Զելենսկին տեսակապով է միացել G7-ի գագաթնաժողովին, որն ընթանում է Գերմանիայի հարավում գտնվող Բավարիայի Էլմաու ամրոցում։
Ի դեպ, «Մեծ յոթնյակի» երկրները որոշել են Կիևին ավելի քան 2,8 միլիարդ դոլարի մարդասիրական օգնություն տրամադրել։ Նրանք պատրաստ են ընդլայնել Ուկրաինայի հետ համագործակցությունը հետախուզության, տեղեկատվության և ծովային անվտանգության ոլորտում. մտադիր են շարունակել նպատակային պատժամիջոցներ կիրառել Ռուսաստանի Դաշնության դեմ, ինչպես նաև սահմանափակել Ռուսաստանի հասանելիությունը իր հիմնական տեխնոլոգիաներին ու ծառայություններին, հատկապես՝ պաշտպանական արդյունաբերությանը։
Նրանք Զելենսկուն խոստացել են աջակցել Կիևին այնքան ժամանակ, որքան անհրաժեշտ կլինի։
Հիշեցնենք` փետրվարի 24-ի վաղ առավոտյան Ռուսաստանի նախագահ Վլադիմիր Պուտինը հայտարարեց, որ Ուկրաինայի նկատմամբ հատուկ ռազմական գործողության մասին որոշում է կայացրել, քանի որ ԼԺՀ-ն ու ԴԺՀ-ն դիմել են օգնության խնդրանքով։
Ուկրաինայում մարտական գործողությունները շարունակվում են արդեն 124-րդ օրը։