ԵՐԵՎԱՆ, 27 հունիսի – Sputnik. Ռուսական էներգակիրների մատակարարումները Հնդկաստանին աճել են տասնյակ անգամներ։ Այս մասին «Ռոսիա-24» հեռուստաալիքի եթերում հայտարարել է Նյու Դելիում Ռուսաստանի դեսպան Դենիս Ալիպովը։
Դիվանագետի խոսքով՝ հնդկական ընկերությունները Ռուսաստանից նավթ ու գազ են գնում համաշխարհային գներից ցածր գներով։ Միաժամանակ նա բացատրել է, որ խոսքը 50 նիշանոց թվերի մասին է, բայց հրաժարվել է «բացարձակ արժեքներ» հայտնել, որպեսզի չբացահայտի ոչ հրապարակային արտաքին առևտրի պայմանագրերի մանրամասները։
«Այնուամենայնիվ, համագործակցությունն աճել է բազմիցս և նույնիսկ տասնյակ անգամներով»,- ասել է Ալիպովը։
Դեսպանը հատկապես կարևորել է, որ Հնդկաստանի կառավարությունը թույլ է տալիս իր ընկերություններին նավթ և գազ գնել Ռուսաստանից` համաշխարհային միջինից ցածր գներով՝ «էներգակիրների գների բարձրացման տարբերությունը չթողնելով վերջնական սպառողների վրա»:
Ռուսաստանյան դիվանագետը ռուսական էներգառեսուրսների մատակարարման հեռանկարները Հնդկաստանին դրական է գնահատել։
Նրա խոսքով՝ հնդկական կողմի հետ լուծվում են երկկողմ առևտրի փոխադարձ հաշվարկների և լոգիստիկայի հարցերը, դիտարկվում են հաշվարկների տարբերակներ ազգային արժույթներով, կոշտ արժույթներով։
Նշենք, որ հունիսի 25-ին հնդկական «Economic Times» պարբերականը ևս հայտնել էր, որ Հնդկաստանը 50 անգամ ավելացրել է ռուսական էներգակիրների գնումները։
Ուկրաինական իրադարձություններից առաջ ռուսական նավթի մասնաբաժինը Հնդկաստանի գնումներում կազմում էր ընդամենը 2%, այժմ այն աճել է մինչև 10%-ի: Ամենախոշոր գնորդների թվում է «Նայարա» նավթավերամշակման գործարանը, որի 49%-ը պատկանում է «Ռոսնեֆթ» ընկերությանը։
Հնդկաստանն աշխարհում նավթի երրորդ խոշոր սպառողն է ԱՄՆ-ից ու Չինաստանից հետո։ Ներմուծված վառելիքի 85 տոկոսն այդ երկիրն օգտագործում է սեփական կարիքների համար։