ԵՐԵՎԱՆ, 27 հունիսի – Sputnik. ՌԴ արտգործնախարար Սերգեյ Լավրովի հայտարարությունը, թե Մինսկի խումբն այլևս գոյություն չունի, եթե ԶԼՄ–ները ճիշտ են վերարտադրել, ապա, մեղմ ասած, տարօրինակ է։ Այսօր հրավիրված մամուլի ասուլիսի ժամանակ ասաց վարչապետ Նիկոլ Փաշինյանը` անդրադառնալով ԵԱՀԿ Մինսկի խմբի լինել-չլինելու մասին հարցին։
«Ռուսաստանի ԱԳՆ-ն ՌԴ նախագահի ենթակայության տակ գործող մարմին է։ Սա ասում եմ, քանի որ 2021-ի ապրիլի 19-ին Ռուսաստան իմ պաշտոնական այցի ժամանակ ՌԴ նախագահ Վլադիմիր Պուտինի հետ համատեղ հայտարարություն ենք ստորագրել, որի 24-րդ կետում ասվում է, որ ԼՂ հարցի շուրջ պետք է համագործակցենք և օգտագործենք Մինսկի խմբի պոտենցիալը` նրա միջազգային մանդատին համապատասխան»,–ասաց Փաշինյանը` հավելելով, որ այս հակասությունը պետք է պարզաբանվի։
Նրա խոսքով` Մինսկի խմբի համանախագահող երեք երկրներն էլ վերահաստատել են իրենց հանձնառությունը` Մինսկի խումբը չի հայտարարել իր չգոյության մասին։ Վարչապետի խոսքով` այդ փաստաթղթերը որևէ մեկը չի չեղարկել։
Փաշինյանը շեշտեց` Մինսկի խմբի համանախագահողների հետ արձանագրել են` խումբը և խմբի միջազգային մանդատը կա, այլ հարց է, թե այդ մանդատի ներքո ով ում հետ ինչ բանավեճ ունի։
Հիշեցնենք՝ օրեր առաջ Բաքվում Ադրբեջանի ԱԳ նախարար Ջեյհուն Բայրամովի հետ հանդիպումից հետո ՌԴ ԱԳ նախարար Լավրովը նշել է, որ ԵԱՀԿ ՄԽ-ն դադարեցրել է իր գործունեությունը ԱՄՆ-ի և Ֆրանսիայի ներկայացուցիչների նախաձեռնությամբ։