ԵՐԵՎԱՆ, 27 հունիսի – Sputnik. Հայտնի բլոգեր Միքայել Բադալյանի (Միկա Բադալյանի) դեմ քրեական գործը հարուցվել է ակնհայտ ապօրինի կերպով, սակայն ՀՀ դատախազությունը շարունակում է նրան անօրինական ձևով պահել կալանքի տակ, նման հայտարարությամբ են հանդես եկել Բադալյանի պաշտպանները։
Պաշտպանները հիշեցնում են, որ Բադալյանին մեղադրանք է առաջադրվել, որ նա տելեգրամյան իր ալիքով, չունենալով նախապատրաստվող ահաբեկչության վերաբերյալ տվյալներ, տվել է առերևույթ սուտ հաղորդում հանցագործության մասին։
Պաշտպանները շեշտում են` ԱԱԾ-ն Բադալյանի դեմ քրգործ հարուցելով՝ վերջինիս գրառումը դիտարկել է ոչ թե որպես վերացական և ընդհանուր բնույթի դիմում, այլ որպես հանցագործության մասին հաղորդում։ Իսկ սա, ըստ փաստաբանների, նշանակում է, որ ԱԱԾ-ն տվյալ պարագայում հանցագործության հաղորդման հիման վրա պետք է կամ քրգործ հարուցեր, կամ մերժեր հարուցումը։ Պաշտպանության կողմը փաստում է` ոչ մի նմանատիպ որոշում քրեական գործի նյութերում առկա չէ։
«Ակնհայտ է, որ քրեական գործ հարուցելու մասին որոշումն անօրինական է այն հիմքով, որ, փաստորեն, բացակայել են քրեական գործ հարուցելու հիմքերը, սակայն ԱԱԾ քննիչը հարուցել է քրեական գործ։ Պաշտպանության կողմը նկատի ունենալով, որ սույն քրեական գործը հարուցվել է օրենքի ակնհայտ և կոպիտ խախտումներով, այսինքն՝ ապօրինի կերպով, միևնույն ժամանակ արձանագրում է, որ անօրինական են նաև այդ գործի շրջանակներում կատարված քննչական և դատավարական գործողությունները և դրանց արդյունքում ձեռք բերված ապացույցները չեն կարող սույն քրգործով դրվել Բադալյանի մեղադրանքի հիմքում»,- ասված է հայտարարության մեջ։
Ուստի, պաշտպանները նշում են, որ նման պայմաններում Միքայել Բադալյանը ոչ միայն պետք է կալանքից ազատ արձակվի, այլև վերջինիս նկատմամբ հարուցված քրեական հետապնդումն արդարացման հիմքով պետք է դադարեցվի։
Հիշեցնենք, որ Բադալյանը բերման էր ենթարկվել ապրիլի 22-ին Ազատության հրապարակից ու ձերբակալվել։ ՀՀ քննչական կոմիտեի տարածած հաղորդագրության համաձայն` նա, չունենալով նախապատրաստվող ահաբեկչության վերաբերյալ տվյալներ, ապրիլի 11-ին տելեգրամյան իր էջում սուտ հաղորդում է տվել, թե արտակարգ իրավիճակ ստեղծելու համար Հայաստանի տարածքում հնարավոր են ահաբեկչություններ։
Բադալյանին մեղադրանք է առաջադրվել ՀՀ քրեական օրենսգրքի 259-րդ հոդվածով (ահաբեկչության մասին սուտ հաղորդում տալը)։
Մայիսի 24-ին Բադալյանը տելեգրամյան իր տեսաուղերձում հայտնել էր, որ դատարանի որոշմամբ` մեկ ամսով կալանքի տակ է լինելու։