ԵՐԵՎԱՆ, 27 հունիսի – Sputnik. ՀՀ վարչապետ Նիկոլ Փաշինյանի ասուլիսը բոյկոտել են այն լրատվամիջոցները, որոնք ներկայացնում են այն քաղաքական շրջանակներին, որոնք վերջին շրջանում բոյկոտային լայն գործունեություն են ծավալել։ Այսօր հրավիրված մամուլիս ասուլիսի ժամանակ նման կարծիք հայտնեց Նիկոլ Փաշինյանը` անդրադառնալով հինգ տասնյակից ավելի ԶԼՄ-ների` Փաշինյանի ասուլիսին չմասնակցելուն։
«Այդ ԶԼՄ-ների մի մասը վերջին շրջանում լայնորեն ներգրավված էին Երևանի փողոցները կաթվածահար անելու պրակտիկայի մեջ։ Բացի այդ, նույն լրատվամիջոցների քաղաքական լիդերները բոյկոտեցին խորհրդարանական ուղիղ եթերով բանավիճելու հնարավորությունները։ Եթե խնդիրը բոյկոտն է, ապա բոյկոտելու պատճառ միշտ էլ կգտնվի։ Այնպես չէ, որ ասում եմ` սա շփման միակ ձևն է, սակայն այն ինչո՞վ ազատ չէ»,-ասաց Փաշինյանը։
Նրա խոսքով` եթե լրատվամիջոցները ասուլիս կամ առերես շփում են ուզում, կարող են կառավարության լրատվական դիմել։
Վարչապետը նշեց, որ զարմանում է «Ազատություն» ռադիոկայանի ներկայացուցչի հարցից, թե ինչու է ինքը խուսափում ուղիղ շփումից լրատվամիջոցների հետ, քանի որ երբ նախկինում նրանց հարցազրույց էր տալիս, շատ ԶԼՄ-ներ բողոքում և ասում էին, թե ինչու իրենց չի տալիս հարցազրույց, այլ «Ազատությանն» է տալիս։
Նա հավելեց, որ եթե այդպես է, ապա պետք է ասեն` հնարավո՞ր է, երբ ԶԼՄ-ների հետ անմիջական հարցուպատասխան լինի, լրատվամիջոցների ներկայացուցիչներն ասուլիսը կաթվածահար անեն կամ էլ կրծքով փակեն ուղիղ եթերի տեսախցիկները։
Հիշեցենեք, որ սա Նիկոլ Փաշինյանի՝ նման ձևաչափով (երբ լրատվամիջոցները հարցերը նախօրոք ուղարկում են, վարչապետը պատասխանում է ուղիղ եթերում) արդեն չորրորդ ասուլիսն է:
Ավելի քան 50 լրատվամիջոցներ, հայտարարել են, որ չեն մասնակցելու նման ասուլիսին։