ԵՐԵՎԱՆ, 27 հունիսի – Sputnik. Հացահատիկի արտահանման խնդրի շուրջ Ստամբուլում օպերատիվ կենտրոն կստեղծվի, դրա շուրջ կողմերը կոնսենսուսի են եկել։ Այս մասին իտալական Il Messaggero թերթի հետ զրույցում հայտնել է Թուրքիայի նախագահի աշխատակազմի հաղորդակցության բաժնի ղեկավար Ֆահրեթին Ալթունը։
Ավելի վաղ Թուրքիայի պաշտպանության նախարար Հուլուսի Աքարը հայտնել էր, որ սևծովյան նավահանգիստներից ուկրաինական հացահատիկի դուրսբերման գործընթացի շուրջ որոշակի առաջընթաց կա, սակայն բաց են մնում տեխնիկական հարցերը, որոնք պահանջում են Ռուսաստանի, Ուկրաինայի ու ՄԱԿ-ի հետ քննարկումներ։ Թուրքիայի արտգործնախարար Մևլութ Չավուշօղլուն էլ նշել էր, որ հացահատիկի խնդրի շուրջ Մոսկվայի ու Կիևի համաձայնության դեպքում կստեղծվի անվտանգության գոտի։
Ինչպես նշել է Ալթունը, Անկարան այս հարցում գործընթացը հեշտացնող միջնորդի դեր է ստանձնել, ինչի արդյունքում համաձայնություն է ձեռք բերվել։
«Հուսով ենք, որ հացահատիկով բեռնված նավերը հնարավորինս շուտ կշարժվեն։ Մենք լիահույս ենք, որ շուտով այս առումով շոշափելի առաջընթաց կգրանցվի։ Կարևորում ենք այս գործընթացի անվտանգ իրականացումը և ցանկացած վթարի կանխարգելումը»,- հայտարարել է Ալթունը։
ՄԱԿ-ում բազմիցս հայտարարել են հացահատիկի պակասուրդի պատճառով պարենային ճգնաժամի սպառնալիքի մասին։ Արևմուտքը Ռուսաստանին մեղադրում է համաշխարհային շուկաներ ուկրաինական հացահատիկի մատակարարմանը խոչընդոտելու մեջ։ Մոսկվան կտրականապես հերքում է նման մեղադրանքները։