ԵՐԵՎԱՆ, 27 հունիսի – Sputnik. ՀՀ ԱԺ «Հայաստան» և «Պատիվ ունեմ» խմբակցությունների պատգամավորների բացակայությունների թույլատրելի սահմանը հատելու վերաբերյալ «Քաղաքացիական պայմանագիր» խմբակցությունում դեռևս որոշում չկա։ Այս մասին առցանց ասուլիսի ժամանակ հայտնեց ՀՀ վարչապետ Նիկոլ Փաշինյանը։
«Սա նշանակում է, որ մեր թիմում էլ վերջնական քննարկում և որոշում չկա։ Այս դեպքում ճիշտ չեմ համարում իմ անձնական դիրքորոշումը հայտնել։ ՔՊ խմբակցությունում առաջիկայում այդ թեմայով քննարկում լինելու է, և նրանց դիրքորոշումը շատ կարևոր է»,– նշեց Փաշինյանը։
Նա հիշեցրեց` ՀՀ օրենսդրությամբ և Սահմանադրությամբ գոյություն ունի ԱԺ պատգամավորին մանդատից զրկելու կարգ, ինչի հիմքում դրված է 1 նստաշրջանում քվեարկությունների կեսից ավելին բացակայելը։ Վարչապետը շեշտեց, որ խորհրդարանական գործունեությունը չի խանգարում քաղաքական տարբեր գործընթացներ իրագործելուն։
Փաշինյանը շեշտեց, եթե ընդդիմադիր պատգամավորներին մանդատներից զրկելու վերաբերյալ ԱԺ խորհուրդը որոշում կայացնի, ապա պետք է դիմել ՍԴ` վերջնական որոշում կայացնելու համար։
Հիշեցնենք, որ մայիսի 1-ից, երբ մայրաքաղաքում սկսվեցին «Դիմադրություն» շարժման բողոքի ակցիաները, ընդդիմադիր պատգամավորները գրեթե չեն մասնակցել ԱԺ նիստերին։