ԵՐԵՎԱՆ, 27 հունիսի – Sputnik. Ադրբեջանում պահվող հաստատված հայ գերիների 90 և ավել տոկոսը գերեվարվել են ռուս խաղաղապահների տեղակայումից հետո և նրանց պատասխանատվության գոտում։ Այսօր հրավիրված առցանց ասուլիսի ժամանակ նման հայտարարություն արեց ՀՀ վարչապետ Նիկոլ Փաշինյանը։
Նա, անդրադառնալով հրադադարից հետո Խծաբերդից ու Հին թաղերից գյումրեցի 62 պահեստազորայինների գերեվարմանը, նշեց, որ այդ տարածքները հանձնված չեն եղել, և դրանք դե յուրե պետք է լինեին ռուս խաղաղապահների վերահսկողության ներքո։
«Եռակողմ հայտարարության հիման վրա զինվորները մնացել են այն դիրքերում, որտեղ պետք է լինեին։ Ես այս թեման քննարկել եմ նաև ռուս խաղաղապահների հրամանատարի, ՌԴ նախագահի հետ եմ քննարկել այդ թեման։ Սակայն պետք է ասել, որ այդ տարածքները խաղաղապահների պատասխանատվության ներքո էին»,–ասաց Փաշինյանը։
Նա նշեց, որ տվյալ համատեքստում Ադրբեջանի վարած քաղաքականությունը նպատակ ունի վարկաբեկել ռուս խաղաղապահների գործունեությունը։
Փաշինյանը հիշեցրեց, որ ապրիլի 6-ին Ադրբեջանի նախագահ Իլհամ Ալիևը ԵԽ նախագահ Շառլ Միշելի ներկայությամբ խոստացել էր գերիների խումբ ազատ արձակել, սակայն հաջորդ հանդիպմանն արձանագրեցին, որ այդ խոստումը չի կատարվել։ Նա հավելեց, որԱլիևն էլ փորձել է Փաշինյանին վերագրել, թե երկաթուղու հետ կապված կոնկրետ կոորդինատներ ներկայացնելու առաջարկ պետք է աներ, սակայն ինքը նման բան չի խոստացել։
Նա նշեց նաև, որ Ադրբեջանի կողմից հաստատված գերիների թիվը 38 է, կա նաև երկրորդ ցուցակ, սակայն որևէ հաստատում չունեն, որ նրանք գերեվարման մեջ են։ Վերջիններըբռնի անհետացածի կարգավիճակ ունեն։
ՀՀ վարչապետը վստահեցրեց, որ գերիների թեմայի մասին անընդհատ խոսում են և խոսելու են, քանի դեռ նույնիսկ մեկ անձ կա Ադրբեջանում։
Հիշեցնենք` մարտի 21-ին ԱԺ արտաքին հարաբերությունների մշտական հանձնաժողովի նիստում ՀՀ արտաքին գործերի նախարար Արարատ Միրզոյանը նույնպես հայտարարեց, որ ադրբեջանական գերության մեջ է 38, այդ թվում՝ քաղաքացիական 3 անձ:
ՄԻԵԴ-ում գերիների հարցով ՀՀ ներկայացուցիչ Սիրանուշ Սահակյանի կարծիքով, սակայն, գերիների իրական թիվը 119 է։