ԵՐԵՎԱՆ, 25 հունիսի – Sputnik. Մեծ Բրիտանիայի վարչապետ Բորիս Ջոնսոնը ծրագրում էր 2020 թվականին իր որդու՝ Վիլֆրեդի համար 184 հազար դոլարանոց տուն կառուցել ծառի վրա։ Գրում է ՌԻԱ Նովոստին՝ հղում անելով «Times»-ին։
«Բորիս Ջոնսոնը որոշել էր ծառի վրա տուն կառուցել Չեկերսի նստավայրի տարածքում, սակայն ստիպված է եղել հրաժարվել այդ մտքից, երբ ոստիկանությունը տան անվտանգության վերաբերյալ մտահոգություն է հայտնել», - գրում է թերթը։
Ջոնսոնի թիկնապահներն ասել են, թե տնակը տեսանելի կլինի ճանապարհից: Բացի այդ, վարչապետի խորհրդականներն էլ մտահոգություն են հայտնել նախագծի արժեքի վերաբերյալ, քանի որ ծառի վրայի տնակն ավելի թանկ կարժենար, քան Բրիտանիայի շատ շրջաններում վաճառվող տները:
Ըստ պարբերականի աղբյուրի` Մեծ Բրիտանիայի վարչապետն իր մտահղացումը քննարկվել է լորդ Դեյվիդ Բրաունլոուի հետ, որը Պահպանողական կուսակցության դոնորն է։
Թերթը հիշեցնում է, որ Բրաունլոուն նախկինում ներգրավված է եղել Դաունինգ սթրիթում Ջոնսոնի բնակարանի վերանորոգման հետ կապված սկանդալում։ Հետևաբար մտահոգություններ են առաջացել, թե նման ծանրակշիռ նվիրատվությունը կարող է շահերի բախման հանգեցնել:
Նշենք, որ Բորիս Ջոնսոնի որդին՝ Վիլֆրեդ Ջոնսոնը, 2 տարեկան է, ծնվել է 2020 թվականի ապրիլին։