ԵՐԵՎԱՆ, 24 հունիսի – Sputnik. Ռուսաստանը երբեք որևէ մեկին միջուկային զենքով չի սպառնացել. Մոսկվայի մոտեցումն դրա հիպոթետիկ օգտագործման հարցում հիմնված է բացառապես զսպման տրամաբանության վրա։ Այս մասին հայտարարել է ՌԴ ԱԳՆ պաշտոնական ներկայացուցիչ Մարիա Զախարովան։
Ավելի վաղ Վիեննայում անկացվեց Միջուկային զենքի արգելման մասին պայմանագիրը ստորագրած 86 պետությունների ներկայացուցիչների գիտաժողովը։ Ստորագրած երկրները ՆԱՏՕ–ի անդամ չեն և չունեն միջուկային զենք։
«Չեն կարող տարակուսանք չառաջացնել գիտաժողովի նախօրեին ուկրաինական հակամարտության համատեքստում հնչած հայտարարությունները` կապված «միջուկային զենքի կիրառման փոխադարձ սպառնալիքների» հետ, ինչպես նաև գիտաժողովի ամբիոնից առանձին արտահայտություններն այն մասին, իբր, Ռուսաստանը «միջուկային շանտաժի» է դիմել։ Կրկին ընդգծում ենք. Ռուսաստանի կողմից որևէ «միջուկային սպառնալիք» երբևէ չի հնչել և չի հնչում», – ասվում է մեկնաբանության մեջ։
Զախարովայի խոսքով` «ռուսական մոտեցումները հիմնված են բացառապես զսպման տրամաբանության վրա, այդ թվում ներկայիս պայմաններում, երբ ուկրաինական ճգնաժամի սրացում հրահրած և ՌԴ–ի դեմ հիբրիդային արշավ սկսած ՆԱՏՕ–ի երկրները, որոնք իրեն «միջուկային դաշինք» են հռչակել, վտանգավոր հավասարակշռություն են պահպանում զինված հակամարտության հենց սահմանին»։
2018 թվականի հոկտեմբերին Ռուսաստանը, Մեծ Բրիտանիան, Չինաստանը, ԱՄՆ–ն և Ֆրանսիան համատեղ հայտարարել էին, որ դեմ են հանդես գալիս Միջուկային զենքի արգելման մասին պայմանագրին և չեն ստորագրելու այն։
2019 թվականի նոյեմբերին ՌԴ ԱԳՆ ղեկավար Սերգեյ Լավրովը հայտարարեց, որ Ռուսաստանը կողմ է միջուկազերծ աշխարհ կառուցելու գաղափարին, սակայն, ըստ նրա, այդ աշխարհը պետք է կառուցել ոչ այսքան միակողմանի և անբարտավան ձևով։ Բացի այդ, միջուկային զենքն ամբողջությամբ ոչնչացնել հնարավոր է միայն այն դեպքում, եթե լինի համընդհանուր և լիարժեք զինաթափում։