Գալիք ուսումնական տարվա ընթացքում միասնական քննություններ կանցկացվեն երկու անգամ։ Եթե դիմորդները քննություն հանձնեն հունվարին, պետք է հայտագրեն միայն առարկան, ոչ թե մասնագիտությունը, իսկ երկուսը միասին կարող են հայտագրել հունիսին կայանալիք քննությունների ժամանակ։ Sputnik Արմենիայի հետ զրույցում այս մասին ասաց ԳԹԿ մամուլի պատասխանատու Խաչանուշ Գրիգորյանը` ներկայացնելով ընդունելության քննությունների նոր համակարգի դրույթները։
«Սա լրացուցիչ հնարավորություն է գործնականորեն ծանոթանալու քննական գործընթացին, թեստերի կառուցվածքին, պատասխանի ձևաթղթին, լրացնելու կարգին։ Դա նաև համապատասխան փորձ ձեռք բերելու հնարավորություն է ընձեռում։ Հունիսյան քննություններին մասնակցելիս դիմորդները կվճարեն 1500 դրամ, իսկ հունվարին` 4500 դրամ, որովհետև տարեսկզբի քննությունների համար ԳԹԿ–ն բյուջեից ֆինանսավորում չի ստանում»,–պարզաբանեց Գրիգորյանը։
Նրա տեղեկացմամբ` այսօր անցկացվեց առաջին փուլի վերջին միասնական քննությունը։ Այս տարի ևս հայտագրումն իրականացվել է մեկ բուհ–մեկ մասնագիտություն սկզբունքով։ Քննությունների առաջին փուլում կարևորվում է մասնագիտական կողմնորոշումը, որպեսզի, օրինակ, պատմության ֆակուլտետ դիմողին դուրս չմղի ավելի բարձր միավորներով դիմորդը (օրինակ, իրավագիտություն կամ միջազգային հարաբերություններ մասնագիտության մրցույթից դուրս մնացած)։
«Առաջին փուլում մրցույթը տեղի է ունենում բացառապես նույն մասնագիտության համար դիմած շրջանավարտների միջև, իսկ երկրորդ փուլում արդեն կարևորվում են բարձր միավորները, ըստ որում` մրցույթի առաջին փուլով բուհ չընդունված, բայց դրական միավորներ ստացած դիմորդները կարող են նաև մրցույթի երկրորդ փուլին մասնակցել՝ հայտագրելով իրենց հանձնած քննություններին համապատասխան 6 մասնագիտություն»,– նշեց ԳԹԿ մամուլի պատասխանատուն։
Գրիգորյանը համաձայն չէ մամուլում շրջանառվող այն տեսակետի հետ, որ ընդունելության կարգի փոփոխման պատճառով 163 մասնագիտություն այս տարի դիմորդ չունի։ Ըստ նրա` այդ մասնագիտությունները մեծ մասամբ վերաբերում են մասնավոր բուհերին և միայն 28-ն են առնչվում պետականներին։ Գրիգորյանը շեշտեց, որ եթե կոնկրետ բուհում առանձին մասնագիտությամբ դիմորդներ չկան, դա չի նշանակում, որ երևույթը տարածվում է ամբողջ հանրապետության վրա, որովհետև այլ բուհերում կարող է լինել տրամագծորեն հակառակ պատկերը։
ԳԹԿ մամուլի պատասխանատուն հայտնեց նաև, որ քննությունների գնահատականների միջին միավորը նախորդ տարվա համեմատ գրեթե նույնն է, միտումները շարունակվում են։
Նշենք, որ միասնական քննությունների առաջին փուլի արդյունքները կամփոփվեն հունիսի 29-ին։
Հիշեցնենք` 2022-ի ընդունելության քննությունները մեկնարկել են հունիսի 7-ին, դրանց մասնակցում է 13 573 դիմորդ։ Այս տարվանից շրջանավարտները կարող են դիմել միայն մեկ մասնագիտություն սովորելու համար, այսինքն, ի տարբերություն նախորդ տարիների` առաջին հայտով չընդունվելու պարագայում երկրորդ կամ երրորդ հայտերից մեկով այլ ֆակուլտետ ընդունվելու հնարավորությունն այլևս չկա: