ԵՐԵՎԱՆ, 24 հունիսի – Sputnik. ՀՀ հակակոռուպցիոն կոմիտեն բացահայտել է լայնածավալ ապօրինի ծառահատումների դեպքեր, որոնց հետևանքով պետությանը պատճառվել է 6 միլիոն դրամի վնաս։ Տեղեկությունը հրապարակվել է կառույցի պաշտոնական կայքում։
Նախաքննության ընթացքում ձեռք բերված ապացույցներով հիմնավորվել է, որ Վահագնիի անտառպետության անտառապետ Մ. Ն.-ն 2021 թվականի ընթացքում հանձնարարել է անտառապահ Ս. Վ.-ին Լոռու մարզի մի խումբ բնակիչների թույլատրել առանց փաստաթղթերի կատարել ապօրինի ծառահատումներ։ Դրանից հետո հիշյալ անձինք յուրաքանչյուր խորանարդ մետր փայտանյութի դիմաց անտառապետին որոշակի գումարներ են վճարել:
Բացի այդ, անտառապետը փայտանյութի վաճառքի վերաբերյալ պայմանավորվածություն է ձեռք բերել Լոռու բնակիչ Ս. Մ.-ի հետ, որից հետո՝ 2021 թվականի մարտից աշնան կեսերն ընկած ժամանակահատվածում, Լոռու Վահագնի համայնքի 2 բնակիչներ ապօրինի հատած փայտանյութն անտառից տեղափոխել են Վահագնաձոր համայնքում գտնվող «Զամարլու» կոչվող տարածք։ Այնտեղից էլ փայտանյութը վերաբարձել են քաղաքացուն պատկանող ավտոմեքենաները: Նշված փայտանյութի մեկ խորանարդ մետրի դիմաց Ս. Մ.-ն անտառապետ Մ. Ն.-ին վճարել է 8000 դրամ, որից 6000 դրամը որպես փայտանյութի արժեք, իսկ 2000 դրամը` փայտը տեղափոխողների «աշխատավարձ»:
Քրեական գործով հիմնավորվել է, որ անտառապետը Լոռու մարզի մի խումբ բնակիչների դրդմամբ պարտականությունները դիտավորությամբ չի կատարել և Վահագնիի անտառպետության տարածքում 2021 թվականի ընթացքում շուրջ 90 տարբեր տրամաչափի ծառեր են հատել` այդ թվում հաճարենի, թխկի, կաղնի, սոճենի, հացենի, բոխի։
Հունիսի 22-ին անտառապետ Մ. Ն.-ն ու ևս երեք անձ ՀՀ հակակոռուպցիոն կոմիտեի քննիչի կողմից ձերբակալվել են, և նրանց մեղադրանք է առաջադրվել ՀՀ քրեական օրենսգրքի 308-րդ հոդվածի 2-րդ մասով` պաշտոնեական լիազորությունները չարաշահելու հատկանիշներով։
Անտառապետին և անտառապահին կալանավորելու վերաբերյալ միջնորդություններ են ներկայացվել Երևան քաղաքի ընդհանուր իրավասության դատարան։