ԵՐԵՎԱՆ, 23 հունիսի – Sputnik. Մայիսին Հայաստանում գրանցված աշխատատեղերի ցուցանիշը նոր ռեկորդ է սահմանել։ Վիճակագրության աճը կառավարության նիստում երկայացնելիս իրավիճակն այսպես բնորոշեց ՀՀ վարչապետ Նիկոլ Փաշինյանը։
«Մայիս ամսին բացարձակ ռեկորդ է սահմանվել բոլոր ամիսների համար։ Մայիսին ՀՀ–ում արձանագրվել է 673 224 վճարովի գրանցված աշխատատեղ»,– ասաց նա։
2021թ–ի մայիսի համեմատ այս թիվն ավել է 38 233–ով կամ 6 տոկոսով, 2019թ–ի մայիսի համեմատ` 72 359–ով կամ 12 տոկոսով, իսկ 2018թ–ի համեմատ` 125 235–ով։
Փաշինյանը նաև հայտնեց, որ մայիսին ՀՀ բոլոր աշխատողները միասին ստացել են 160 մլրդ 56 մլն դրամ, իսկ վճարված եկամտահարկը կազմել է 32մլրդ 741 մլն դրամ։
Միջին աշխատավարձը մայիսին Հայաստանում կազմել է 237 745 դրամ, որը, նախորդ տարվա ցուցանիշով, ավել է շուրջ 26 000 դրամով կամ 12 տոկոսով։