Ռուսաստանի և Բելառուսի դեսպանները Հիշատակի և վշտի օրը հանդիպել են հայ վետերանների հետ

ԵՐԵՎԱՆ, 22 հունիսի – Sputnik. ՌԴ և Բելառուսի դեսպաններ Սերգեյ Կոպիրկինն ու Ալեքսանդր Կոնյուկը հանդիպել են Հայրենական մեծ պատերազմի վետերանների և Լենինգրադի պաշարումը վերապրածների հետ։ Այս մասին հայտնում է Երևանում Ռուսական տան մամուլի ծառայությունը (Հայաստանում «Ռոսսոտրուդնիչեստվոյի» ներկայացուցչություն)։

Հանդիպումը կայացել է Հայաստանի վետերանների միությունում։ Հանդիպմանը մասնակցել են նաև «Ռոսսոտրուդնիչեստվոյի» ներկայացուցիչներ, ինչպես նաև Հայաստանում Ռուսաստանի և Ղազախստանի ռազմական կցորդներ Իգոր Շչերբակովն ու Կենժեբեկ Օրիմբաևը։

Հանդիպման մասնակիցները մեկ րոպե լռությամբ հարգել են Հայրենական մեծ պատերազմի հերոսների հիշատակը։

«Հիշողությունը ուժի աղբյուր է։ Առանց այդ հիշողության մեզ ավելի դժվար կլիներ լուծել այսօրվա խնդիրները», – հայտարարել է Սերգեյ Կոպիրկինը։

Նրա խոսքով` ներկայիս իրավիճակում Ռուսաստանի համար կարևոր է դաշնակիցների, եղբայրական երկրներիֆիզիկական և հոգեբանական աջակցությունը, և Ռուսաստանն այդ աջակցությունը զգում է Հայաստանից և հայ ժողովրդից։

Դեսպանները նշել են Հայրենական մեծ պատերազմի պատմության խեղաթյուրման և նացիզմի վերանայման անթույլատրելիությունը, որին ականատես ենք լինում մեր օրերին։

Բելառուսի դեսպան Ալեքսանդր Կոնյուկը հիշեցրել է, որ պատերազմի տարիներին ոչնչացվել է հանրապետության բնակչության 1/4-րդը։

«Դուք կենդանի օրինակ եք նրա, թե ինչպես է պետք ապրել և ծառայել սեփական հայրենիքին», – հայտարարել է Կոնյուկը` դիմելով վետերաններին։

Բելառուսի Հանրապետության դեսպանատան անունից Հայաստանի վետերանների միության անդամներին շնորհվել են շնորհակալագրեր` խորհրդային ժողովրդի Մեծ հաղթանակի հիշատակը պահելու հարցում նշանակալի ավանդի համար, իսկ Հայաստանում Ռուսաստանի դեսպանատան անունից` սննդամթերքի հավաքածուներ և նվերներ։