ԵՐԵՎԱՆ, 21 հունիսի – Sputnik. Վլադիմիր Զելենսկու մամուլի քարտուղար Սերգեյ Նիկիֆորովը ուկրաինական Strana.ua առցանց լրատվամիջոցի հետ զրույցում հաստատել է, որ Ուկրաինայից հացահատիկնարտահանելու շուրջ բանակցություններ կկայանան Ստամբուլում։
Թուրքական «Hürriyet» թերթն այսօր հայտնել էր, որ եկող շաբաթ Թուրքիայի, Ռուսաստանի, Ուկրաինայի ու ՄԱԿ–ի ներկայացուցիչների միջև քառակողմ հանդիպում կկայանա, որի ընթացքում կքննարկվի հացահատիկի հարցը, իսկ մինչ այդ սպասվում է թուրքական ռազմական պատվիրակության այցը Մոսկվա:
«Կարող եմ հաստատել, որ բանակցությունների նախապատրաստական աշխատանքներ են ընթանում: Բայց ես դեռ չէի խոսի դրա մասին որպես կատարված փաստ: Միակ բանը, որ կարող եմ ասել, այն է, որ բանակցություններն ամենաբարձր մակարդակով չեն կայանա», - ասել է Նիկիֆորովը:
Ավելի վաղ հայտնի էր դարձել, որ Թուրքիայի նախագահ Ռեջեփ Թայիփ Էրդողանը հացահատիկն Ուկրաինայից արտահանելու խնդիրը քննարկել է ՄԱԿ-ի գլխավոր քարտուղար Անտոնիո Գուտերեշի ու Մեծ Բրիտանիայի վարչապետ Բորիս Ջոնսոնի հետ: Էրդողանը նշել էր, որ Անկարան շարունակում է ջանքեր գործադրել այդ հարցը լուծելու համար։
ՄԱԿ–ում բազմիցս հայտարարել են, որ հացահատիկի պակասուրդի պատճառով պարենային ճգնաժամի սպառնալիք է հասունացել, Արևմուտքը Ռուսաստանին է մեղադրում համաշխարհային շուկա ուկրաինական հացահատիկի մատակարարումները խոչընդոտելու հարցում։ Մոսկվան կտրականապես հերքում է մեղադրանքները։
ՌԴ նախագահ Վլադիմիր Պուտինն էլ հայտարարել է, որ Ուկրաինայից հացահատիկն արտահանելու խնդիրներ չկան, և Ռուսաստանը որևէ կերպ չի խոչընդոտում։ Նրա խոսքով` եթե Ուկրաինան ականազերծի նավահանգիստները, հացահատիկով բեռնված նավերը կկարողանան այնտեղից դուրս գալ առանց որևէ խնդրի։