ԵՐԵՎԱՆ, 21 հունիսի – Sputnik. Հայաստանի բասկետբոլի ազգային հավաքականը կմասնակցի Երևանում կայանալիք «SADA Cup» միջազգային մրցաշարին, որը կանցկացվի հունիսի 23-26-ը։ Մրցաշարին կմասնակցեն նաև Իրանի և Սիրիայի հավաքականները, «Թիմ ԱՄՆ»-ն: Տեղեկությունը լրագրողներին հայտնեց Հայաստանի բասկետբոլի հավաքականի գլխավոր մարզիչ Ռեքս Քալամյանը։
«Ունենք նոր թիմ, նոր խաղացողներ, արդեն հասցրել ենք 7 մարզում անցկացնել: Պատրաստվում ենք մրցաշարին, որից հետո կմեկնենք Մալթա` փոքր երկրների Եվրոպայի առաջնությանը»,- ասաց նա:
Քալամյանի խոսքով՝ պետք է ամեն ինչ անել ոչ միայն հաղթելու, այլև մեր երկրում բասկետբոլը զարգացնելու համար։
«Հայաստան գալուս հիմնական նպատակն է նպաստել Հայաստանում բասկետբոլի զարգացմանը: Յուրաքանչյուր տարի պայմանների լավացում է նկատվում: Պետք է հիմք ստեղծենք, որպեսզի աճի մարզաձևը»,- ասաց Քալամյանը։
Հայաստանի հավաքականի բասկետբոլիստ Անդրե Սպայթ Մկրտչյանի կարծիքով՝ «SADA Cup»-ը շատ կարևոր մրցաշար է Հայաստանի թիմի համար։
«Կարևոր մրցաշար է լինելու, որով պետք է պատրաստվենք Մալթայում կայանալիք փոքր երկրների Եվրոպայի առաջնությանը։ Մարզումներն անցնում են շատ պրոֆեսիոնալ մակարդակով»,- նշեց Մկրտչյանը։
Հավաքականի ներկայացուցիչ Ալբերտ Թադևոսյանը մեծ ակնկալիք ունի Մալթայում կայանալիք մրցաշարից։
«Երկար դադարից հետո հավաքականը վերաձևավորվել է։ Մարզումները շատ լավ են անցնում։ Արագությունները շատ բարձր մակարդակի են։ Մալթայում կայանալիք մրցաշարից մեր ակնկալիքը առաջին տեղը գրավելն է»,- ասաց նա։
Հայաստանի հավաքականը հուլիսի առաջին կեսին Մալթայում կմասնակցի փոքր երկրների Եվրոպայի առաջնությանը։
Հիշեցնենք, որ NBA-ի մարզիչ Ռեքս Քալամյանը Հայաստանի հավաքականը գլխավորում է 2022 թվականի հունվարից։