ԵՐԵՎԱՆ, 21 հունիսի – Sputnik. Արևմուտքը լծվել է ռուսաստանցի մասնագետներին իր կողմը գրավելու գործին, որպեսզի «հավաքագրի» նրանց ու արտասահման տանի։ Այս հայտարարությունն արել է ՌԴ անվտանգության խորհրդի փոխնախագահ Դմիտրի Մեդվեդևը։
Հունիսի 21-ին Մեդվեդևը մասնակցել է ՌԴ անվտանգության խորհրդի կրիտիկական տեղեկատվական ենթակառուցվածքի զարգացման ոլորտում պետության տեխնոլոգիական ինքնիշխանության ապահովման հարցերի միջգերատեսչական հանձնաժողովի նիստին:
«Մեզ համար հիմա շատ կարևոր է հակադարձել այն ուժեղ ճնշմանը, որ կիրառվում է մեր երկրի և այս ոլորտի հանդեպ։ Դրանք և՛ կիբեռհարձակումներ են, և՛ տեխնոլոգիական շրջափակումը, և՛ մեր մասնագետների զանգվածային «հավաքագրումը»՝ նրանց արտասահման տեղափոխելու նպատակով»,- ասել է Մեդվեդևը։
Նրա խոսքով՝ իշխանության բոլոր մարմիններն ու պետական ընկերություններն այսօր տեխնոլոգիական անվտանգության ապահովման հարցում պետք է արագ ու համակարգված աշխատեն։ «Այլապես մեզ պարզապես կուտեն»,- ավելացրել է Մեդվեդևը։
ՌԴ անվտանգության խորհրդի փոխնախագահը նշել է, որ ռուսական ՏՏ մշակումներից շատերը հիմնված են արևմտյան տեխնոլոգիաների վրա:
«Դա վտանգում է նրանց աշխատանքը արդեն գործող կամ նոր պատժամիջոցների պայմաններում կամ մեր հակառակորդների կողմից որևէ այլ ոչ բարեկամական քայլերի կիրառման դեպքում, էլ չենք խոսում թաքնված աշխատանքի մասին»,- ասել է նա:
Մեդվեդևի կարծիքով՝ պետք է ռուսական արտադրանքի գնահատման չափանիշներ սահմանել։
«Մենք պետք է մշակենք ՏՏ ոլորտի ներքին մշակումներին աջակցելու միջոցներ։ Այդ մշակումները պետք է լիովին անկախ լինեն օտարերկրյա մշակումներից ու ծառայություններից, այսինքն՝ ամբողջովին ռուսական լինեն, ու պետք է, որքան հնարավոր է՝ շուտ գործարկվել դրանք»,- շեշտել է նա։
Հիշեցնենք` փետրվարի 24-ի վաղ առավոտյան Ռուսաստանի նախագահ Վլադիմիր Պուտինը հայտարարեց, որ Ուկրաինայի նկատմամբ հատուկ ռազմական գործողության մասին որոշում է կայացրել, քանի որ ԼԺՀ-ն ու ԴԺՀ-ն դիմել են օգնության խնդրանքով։
Փետրվարի 21-ից ի վեր, երբ Վլադիմիր Պուտինը հայտարարեց ԼԺՀ-ն ու ԴԺՀ-ն ճանաչելու որոշման մասին, ԱՄՆ-ն, Եվրամիությունն ու Արևմուտքի շատ երկրներ պատժամիջոցների շարք սկսեցին Ռուսաստանի դեմ։ Պատժամիջոցներն առնչվում են բանկային ոլորտին, ավիացիային, տնտեսության տարբեր ճյուղերին, կապի ոլորտին և անգամ մշակույթին ու սպորտին։
Ուկրաինայում մարտական գործողությունները շարունակվում են արդեն 118-րդ օրը։