Նախարարությունն իրավասու չէ Ջհանգիրյանի նկատմամբ կարգապահական վարույթ հարուցել. փոխնախարար

ԵՐԵՎԱՆ, 21 հունիսի – Sputnik. Արդարադատության նախարարությունն իրավասու չէ ԲԴԽ նախագահի պարտականությունները կատարող Գագիկ Ջհանգիրյանի նկատմամբ կարգապահական վարույթ հարուցել։ ԱԺ–ում լրագրողների հետ զրույցում ասաց ՀՀ արդարադատության փոխնախարար Գրիգոր Մինասյանը։

Հայտնել էինք, որ ԲԴԽ նախագահ (լիազորությունները կասեցված) Ռուբեն Վարդազարյանը հունիսի 20-ին ասուլիսում հայտարարել էր, թե ապացույց ունի, որ իր դեմ կատարվող բոլոր գործողությունները քաղաքական որոշման արդյունք են։ Որպես ապացույց նա հրապարակել էր իր, ԲԴԽ նախագահի պարտականությունները կատարող Գագիկ Ջհանգիրյանի ու ԲԴԽ անդամ Ստեփան Միքայելյանի մասնակցությամբ զրույցի ձայնագրությունը։

«Նախարարությունն այդպիսի իրավասություն չունի։ Միայն ԲԴԽ երեք անդամները կարող են օրենքով սահմանված կարգով ԲԴԽ անդամին կարգապահական պատասխանատվության ենթարկել»,–ասաց փոխնախարարը։

Հիշեցնենք, որ Վարդազարյանը մամուլի ասուլիսի ժամանակ հայտարարել էր, որ 2021-ի փետրվարի 20-ին վարչապետի անունից իրեն փոխանցել են, որ պետք է հրաժարական տա։ Նա նշել է, որ մինչև մարտի 1-ը ժամանակ է պետք։ Եվ ձայնագրությունում հենց այդ մասին է խոսվում, որ մինչև նշված ժամանակահատվածը Վարդազարյանի դեմ չպետք է որևէ քրգործ հարուցվի, եթե նա հրաժարական տա։ Հակառակ դեպքում, Ջհանգիրյանը «ոչինչ չի կարող երաշխավորել»։

Ի դեպ, Վարդազարյանի դեմ կարգապահական վարույթ է հարուցվել ԲԴԽ 3 անդամների` Գրիգոր Բեքմեզյանի, Լիպարիտ Մելիքջանյանի, Դավիթ Խաչատուրյանի նախաձեռնությամբ։ Որպես հիմք օգտագործվել է Վարդազարյանի հարցազրույցը, որում անդրադարձել է ՍԴ որոշմանը՝ կապված Ջհանգիրյանի՝ ԲԴԽ անդամ ընտրվելու դիմումի հետ։ Միջնորդության հեղինակները կարծում են, թե Վարդազարյանը գնահատական է տվել ՍԴ որոշմանը՝ առանց ծանոթանալու ամբողջական որոշմանը, կասկածի տակ է դնում ԲԴԽ-ի վերջին 1,5 տարվա գործունեությունը, որոշումները։

ԲԴԽ–ն Վարդազարյանին կարգապահական պատասխանատվության ենթարկելու միջնորդության վերաբերյալ որոշումը կհայտնի հունիսի 23-ին՝ ժամը 13.55-ին։