ԵՐԵՎԱՆ, 20 հունիսի – Sputnik. Բարձրագույն դատական խորհուրդը անդրադարձել է այսօր ԲԴԽ նախագահ (լիազորությունները կասեցված) Ռուբեն Վարդազարյանի կողմից գաղտնի ձայնագրություն հրապարակմանը, որում ԲԴԽ նախագահի պարտականությունները կատարող Գագիկ Ջհանգիրյանը և ԲԴԽ անդամ Ստեփան Միքայելյանը տարբեր հարցեր են քննարկում։
Վարդազարյանը հայտարարել էր, որ այդ ձայնագրությամբ կարող է ապացուցել, որ իր դեմ կատարվող ամեն ինչ քաղաքական որոշում է, ու ԲԴԽ-ում իրեն զրկել են ապացույց ներկայացնելու իրավունքից։
«Ի պատասխան զանգվածային լրատվության միջոցների հարցումների` հայտնում ենք, որ Բարձրագույն դատական խորհրդի նախագահի պաշտոնակատարը հացի սեղանի շուրջ տեղի ունեցած մասնավոր զրույցի մանրամասները չի մեկնաբանում: Տեղեկացնում ենք նաև, որ ձայնագրությունը կատարվել է առանց պարոն Գ. Ջհանգիրյանի իմացության»,-նշված է ԲԴԽ-ի տարածած հայտարարության մեջ։
Նշենք, որ Վարդազարյանը հայտարարել էր, որ 2021 թվականի փետրվարի 20-ին վարչապետի անունից իրեն փոխանցել են, որ պետք է հրաժարական տա։ Նա նշել է, որ իրեն մինչև մարտի 1-ը ժամանակ է պետք։ Եվ ձայնագրությունում հենց այդ մասին է խոսվում, որ մինչև նշված ժամանակահատվածը Վարդազարյանի դեմ չպետք է որևէ քրգործ հարուցվի, եթե նա հրաժարական տա։ Հակառակ դեպքում, Ջհանգիրյանը «ոչինչ չի կարող երաշխավորել»։
Նշենք, որ ԲԴԽ նախագահ (լիազորությունները կասեցված) Ռուբեն Վարդազարյանի դեմ կարգապահական վարույթ է հարուցվել ԲԴԽ երեք անդամների նախաձեռնությամբ։ Վարույթ հարուցելու համար դիմել են Գրիգոր Բեքմեզյանը, Լիպարիտ Մելիքջանյանը, Դավիթ Խաչատուրյանը։ Որպես հիմք օգտագործվել է լրատվականներից մեկում հրապարակված հարցազրույցը, որում Վարդազարյանն անդրադարձել է ՍԴ որոշմանը՝ կապված Գագիկ Ջհանգիրյանի՝ ԲԴԽ անդամ ընտրվելու դիմումի հետ։
Միջնորդության հեղինակները կարծում են, թե Վարդազարյանը գնահատական է տվել ՍԴ որոշմանը՝ առանց ծանոթանալու ամբողջական որոշմանը, թույլ է տվել հեգնական արտահայտություններ, որով քննադատվում է ՍԴ որոշումը, կասկածի տակ է դնում հիմնավորվածությունը, օբյեկտիվությունը և անաչառությունը, ինչպես նաև ԲԴԽ-ի վերջին 1,5 տարվա գործունեությունը, որոշումները։
ԲԴԽ-ն հեռացել է խորհրդակցական սենյակ՝ Վարդազարյանին կարգապահական պատասխանատվության ենթարկելու միջնորդության վերաբերյալ որոշում կայացնելու։ ԲԴԽ-ն որոշումը կհրապարակի հունիսի 23-ին՝ ժամը 13.55-ին։