ԵՐԵՎԱՆ, 17 հունիսի – Sputnik. Աղետի գոտու անօթևան ընտանիքների համար բնակարանների կառուցման համար հատկացված միջոցների նպատակային օգտագործման փաստը կստուգվի, դատախազությունը հայտնում է, որ քրեական գործ է հարուցվել։
ՀՀ կառավարության 2020թ. մայիսի 7-ի և 2021թ. հունիսի 17-ի որոշումներով սահմանվել են աղետի գոտու բնակավայրերում երկրաշարժի հետևանքով անօթևան մնացածների բնակապահովման պետական աջակցության միջոցառումները։ Այն վերաբերում է Շիրակի մարզի 7 բնակավայրերի 27 տների շահառուներին: Որոշման կատարումն ապահովելու նպատակով Շիրակի մարզպետարանի և «Ֆուլեր տնաշինական կենտրոն» բարեգործական ՀԿ–ի միջև կնքվել է տների կառուցման շինարարական աշխատանքների կազմակերպման պայմանագիր։ Պետության կողմից հատկացվել է 437 մլն դրամ:
Սկզբնական շրջանում ՀԿ–ին փոխանցվել է 310 մլն դրամ` նրանց ներկայացրած հաշվետվության համաձայն։
Պարզվել է` կազմվել և Շիրակի մարզպետարան է ներկայացվել կատարված աշխատանքների վերաբերյալ ընդհանրական տվյալներ պարունակող հաշվետվություններ, որոնցում բացակայել են աշխատանքի քանակական ու որակական բնութագրիչները: Բացի այդ, մարզպետարանի պաշտոնատար անձինք չեն ստուգել իրականացվող աշխատանքները։
Պարզվել է նաև, որ պայմանագրի շրջանակներում բարեգործական ՀԿ-ն պետական միջոցների հաշվին կատարել է 13 մլն դրամի ծախսեր, որոնք, սակայն, անմիջական չեն առնչվել կնքված պայմանագրով նախատեսված տների կառուցման հետ:
ՀՀ գլխավոր դատախազության պետական շահերի պաշտպանության վարչությունում հարուցվել է քրեական գործ ՀՀ քրեական օրենսգրքի 315-րդ հոդվածի 2-րդ մասի հատկանիշներով` պաշտոնեական անփութությունը։
Նախաքննությունն իրականացնելու համար քրգործն ուղարկվել է ՀՀ քննչական կոմիտե:
Հիշեցնենք, որ Սպիտակի ավերիչ երկրաշարժից 33 տարի անց Գյումրիում դեռ տնակներում ու վթարային կառույցներում բնակվող ընտանիքներ կան: Քաղաքը որպես «հիշողություն» 2776 տնակ ունի։