ԵՐԵՎԱՆ, 17 հունիսի - Sputnik. ՀՀ իշխանությունները չեն պատրաստվում քրեական պատասխանատվության ենթարկել Երևանում բողոքի ակցիա իրականացնողներին։ Այս մասին ՌԻԱ Նովոստիի հետ զրույցում, որն անցկացվել է Սանկտ Պետերբուրգի տնտեսական միջազգային ֆորումի շրջանակում, ասել է ՀՀ փոխվարչապետ Մհեր Գրիգորյանը։
«Ի՞նչ եք ասում։ Մեզ մոտ իրավունքի գերակայությամբ ժողովրդավար երկիր է, հետևաբար, բոլոր իրադարձություններն ու գործողություններն անցնում են իրավական հունով»,– ասել է Գրիգորյանը։
Նա նաև ընդգծել է, որ իր կարծիքով բողոքի ակցիաները խնդիր չեն, դրանք «միանգամայն նորմալ երևույթ են»։
«Մեզ մոտ եղել են ընտրություններ, որոնք բացարձակ բաց են եղել, ժողովրդավարական, թափանցիկ և, իմ կարծիքով, բոլոր հարցերի պատասխանները, որոնք այսօր շրջանառվում են, արդեն մեծամասնությանը տրվել են»,– ընդգծել է փոխվարչապետը։
Հիշեցնենք` ՀՀ վարչապետ Նիկոլ Փաշինյանի` Արցախի վերաբերյալ հայտարարությունից հետո Հայաստանում բողոքի ալիք բարձրացավ։
Մայիսի 1-ին Երևանի Ֆրանսիայի հրապարակում մեկնարկեց ընդդիմության բազմահազարանոց հանրահավաքը։ Մասնակիցները վրաններ ու բարիկադներ տեղադրեցին, Իշխան Սաղաթելյանը հայտարարեց, որ մայիսի 2-ից սկսում են անհնազանդության ակցիաներ՝ փակելով փողոցները։
Մայիսի 2-ից սկսած` ամեն օր Երևանում կազմակերպվում են անհնազանդության երթեր ու հանրահավաքներ, այլ միջոցառումներ։
«Դիմադրություն» շարժման անդամ Իշխան Սաղաթելյանը հունիսի 14-ին հայտարարեց, որ վրանային ավանը լիարժեք կատարել է իր գործը, և հունիսի 15-ին վրանները հավաքելու են: Դա, սակայն, ընդդիմադիրի խոսքով, ամենևին էլ պայքարի ավարտ չի նշանակում. գնալու են մինչև վերջ: