ԵՐԵՎԱՆ, 16 հունիսի – Sputnik. Սլովակիան Ուկրաինային 5 ուղղաթիռ և ռազմամթերք է նվիրել։ Այս մասին հայտնում են ԶԼՄ–ները` հղում անելով պաշտպանության նախարար Յարոսլավ Նադին։
Նշվում է, որ Բրատիսլավան Կիևին է փոխանցել 4 Մի-17 և 1 Մի-2 ուղղաթիռներ, ինչպես նաև «Գրադ» համակարգի համար նախատեսված զինամթերք։ Մատակարարումը հաստատվել է կառավարության կողմից։
«Ինչպես նախորդ դեպքերում, այս անգամ նույնպես Ուկրաինայի համար նախատեսված մատակարարման համար Սլովակիային կվճարվի Խաղաղության եվրոպական հիմնադրամից, ինչը Կիևի հետ ԵՄ–ի համերաշխության նշան է», – նշել է պաշտպանության նախարարը։
Նրա խոսքով` Ուկրաինա ուղարկված ուղղաթիռներն արդեն իսկ դուրս են բերվել հանրապետության ՌՕՈւ–ի կազմից և փոխարինվել ավելի ժամանակակից` UH-60M Black Hawk ուղղաթիռներով։
Ավելի վաղ ՌԴ–ն նոտա էր հղել արևմտյան երկրներին ուկրաինային սպառազինություն մատակարարելու պատճառով։ ՌԴ ԱԳՆ ղեկավար Սերգեյ Լավրովը հայտարարել էր, որ Ուկրաինայի ցանկացած բեռ, որի մեջ զենք կա, Ռուսաստանի համար օրինական թիրախ է հանդիսանալու։
Հիշեցնենք` փետրվարի 24-ի վաղ առավոտյան Ռուսաստանի նախագահ Վլադիմիր Պուտինը հայտարարեց, որ Ուկրաինայի նկատմամբ հատուկ ռազմական գործողության մասին որոշում է կայացրել, քանի որ ԼԺՀ-ն ու ԴԺՀ-ն դիմել են օգնության խնդրանքով։
Ուկրաինայում մարտական գործողությունները շարունակվում են արդեն 113-րդ օրը։