ԵՐԵՎԱՆ, 16 հունիսի – Sputnik. Լիբանան տեղափոխված ավելի քան 1,4 միլիոն սիրիացի փախստականները սկսում են վտանգ ներկայացնել այդ երկրի ազգային ինքնության համար: Եվ դրա պատճառն այն է, որ Արևմուտքը չի ցանկանում աջակցել սիրիացիներին հայրենիք վերադարձնելու` ռուս-սիրիական նախաձեռնությանը։ Այս մասին հայտարարել է ՌԴ պաշտպանության վարչության ազգային կենտրոնի պետ, գեներալ-գնդապետ Միխայիլ Միզինցևը` Ռուսաստանի Դաշնության և Սիրիայի միջգերատեսչական համակարգման շտաբի համատեղ նիստում։
Նրա խոսքով` նախաձեռնությանը միանալու` արևմտյան երկրների չկամությունն արդեն իսկ հանգեցրել է Լիբանանում լայնածավալ ճգնաժամի։
«Ակնհայտ է, որ Լիբանանում Սիրիայից մեծաքանակ փախստականների առկայությունը, որոնց թիվն այսօր գերազանցում է 1,4 միլիոնը, ոչ միայն ահռելի տնտեսական բեռ, այլև մարտահրավեր է այդ երկրի ազգային ինքնությանը, քանի որ խախտում է ավանդական էթնո-դավանաբանական հավասարակշռությունը»,- ասել է ՌԴ գեներալը։
Միզինցևի տեսանկյունից` սիրիացիներին ձուլելու Արևմուտքի քաղաքականությունը կործանարար հետևանքների է հանգեցնում լիբանանյան ժողովրդագրության համար. այսօր արդեն Լիբանանում ծնված յուրաքանչյուր երկրորդ երեխան սիրիացի է։
Ռուս գեներալը շեշտել է, որ Սիրիայի իշխանությունները շարունակաբար աշխատում են հարևան պետությունից իրենց քաղաքացիների վերադարձի ընթացակարգը պարզեցնելու ուղղությամբ ։
2022 թվականի մայիսի 15-ին Սիրիայի ՆԳՆ-ն լրացուցիչ սահմանային անցակետ և միգրացիոն կենտրոն է տեղակայել Լիբանանի հետ սահմանին, որտեղ կազմակերպվել են անհրաժեշտ միջոցառումներ՝ ապահովելու քաղաքացիների անվտանգ վերադարձն իրենց տներ։