ԵՐԵՎԱՆ, 16 հունիսի - Sputnik. ՀՀ կրթության, գիտության, մշակույթի և սպորտի փոխնախարար Արա Խզմալյանը ներկա է եղել «Հայաստանի մշակույթի օրեր Ռուսաստանի Դաշնությունում» ծրագրին։
Տեղեկությունը հայտնում է ՀՀ ԿԳՄՍ նախարարության հասարակայնության հետ կապերի և տեղեկատվության վարչությունը։
ՌԴ-ում հայկական մշակույթի օրերի շրջանակում Մոսկվայում և Կիսլովոդսկում համերգներով հանդես են եկել Հայաստանի ազգային ֆիլհարմոնիկ նվագախումբը և Կոմիտասի անվան ազգային քառյակը: Հնչել են նաև Արամ Խաչատրյանի և Առնո Բաբաջանյանի ստեղծագործությունները։
«Շատ կարևոր է, որ Ռուսաստանում հայկական մշակույթի օրերը մեկնարկել են մեր լավագույն կոլեկտիվներից մեկի՝ դասական չափանիշներին մշտապես հավատարիմ Հայաստանի ազգային ֆիլհարմոնիկ նվագախմբի համերգով, որովհետև յուրաքանչյուր քաղաքակիրթ պետության անձնագրերից մեկն իր ֆիլհարմոնիկ նվագախումբն է: Մեր նվագախմբի կատարողական որակը մեզ թույլ է տալիս հպարտանալ միջազգային հարթակում: Համերգն անցավ լեփ-լեցուն դահլիճում»,- ասել է ԿԳՄՍ փոխնախարարը:
Խզմալյանն ընդգծել է, որ հայկական մշակույթի բազմաթիվ ոլորտներ և ճյուղեր զարգացել են ռուս գեղարվեստական կրթության ազդեցությամբ: Նա նաև մատնանշել է ռուս լավագույն մտավորականների՝ հայ մշակույթի հանդեպ բացառիկ վերաբերմունքը, որն արտահայտվել է թե՛ գիտական հրատարակությունների, թե՛ թարգմանությունների ու հետազոտական աշխատանքների տեսքով:
Այցի շրջանակում Արա Խզմալյանը հանդիպել է Ռուսաստանի Դաշնության մշակույթի նախարարի տեղակալ, պետքարտուղար Ալլա Մանիլովայի հետ:
Երկու երկրների գործընկերները քննարկել են առաջիկայում միջպետական հնարավոր ծրագրերը, այդ թվում՝ սեպտեմբեր-հոկտեմբեր ամիսներին Հայաստանում ռուս հոգևոր մշակույթի օրերի անցկացման վերաբերյալ մանրամասները, պատվիրակության մոտավոր կազմը, ծրագրի նախնական բովանդակությունը:
Խզմալյանն ընդգծել է հայ-ռուսական համագործակցության արդյունավետ փորձը նաև հին ձեռագրերի և արխիվային փաստաթղթերի վերականգնման ոլորտում:
Նշենք, որ նախարարի տեղակալը հունիսի 10-12-ը պաշտոնական այցով գտնվում էր Ռուսաստանի Դաշնությունում՝ մասնակցելու «Ռուսաստանում Հայաստանի մշակույթի օրեր» ծրագրին: