ԵՐԵՎԱՆ, 16 հունիսի – Sputnik. Սանկտ Պետերբուրգի միջազգային տնտեսական համաժողովում Հայաստանի փոխվարչապետ Մհեր Գրիգորյանը կարևորել է ԵԱՏՄ փոխադարձ առևտրում ազգային արժույթների մասնաբաժնի ավելացումը, հաղորդում է ՏԱՍՍ–ը։
«Փոխադարձ առևտրի և արժույթի հարցը, որով կատարվում է այդ առևտուրը, մշտապես մեր օրակարգում է։ Որքան էլ որ այդ ոլորտում ազգային արժույթի մասնաբաժինն ավելացել է, բայց սա դեռ այն արդյունքը չէ, որին մենք ձգտում ենք, քանի որ արտարժույթներին կապվածության մակարդակը շարունակում է բարձր մնալ, և դա լուրջ ծախսեր է առաջ բերում»,- ասել է Գրիգորյանը` հավելելով, որ այդ ծախսերը նաև գնաճի խթան են դառնում` լուրջ ազդեցություն թողնելով հատկապես սոցիալական ոլորտի վրա։
«Հայաստանը բախվեց այդ խնդրին, երբ սկսեց կառավարել պարենային անվտանգության ռիսկերը, ինչ էլ ասենք դրա մասին, իրողություն է. պարենային անվտանգության հարցը միասնական լուծում է պահանջում»,- ասել է նա։
Փոխվարչապետը համոզմունք է հայտնել, որ հարցը պետք է լինի ԵԱՏՄ գործունեության հիմնական ուղղություններից մեկը, որին պետք է հնարավորինս արագ լուծումներ գտնել։
Մհեր Գրիգորյանը խոսել է նաևՀայաստանի առջև ծառացած լոգիստիկ խնդիրների մասին` դրանց լուծման համար կարևորելով Պարսից ծոցից Սեւ ծով տանող ճանապարհների կառուցումը։