ԵՐԵՎԱՆ, 16 հունիսի – Sputnik. Երևանի Արաբկիր վարչական շրջանում գտնվող Սուրբ Խաչ եկեղեցու բակից մեկնարկել է «Դիմադրություն» շարժման իրազեկման երթը։
Ինչպես երթից առաջ հայտարարեց հավաքի համակարգողներից Սևակ Նազարյանը, երթն անցնելու է Կոմիտասի պողոտայով` դեպի քննչական կոմիտեի շենք։
«Գնալու ենք քննչական կոմիտե, որտեղ մեր բողոքի ձայնն ենք բարձրացնելու Հայաստանում տիրող անօրինությունների դեմ»,– ասաց նա։
ՔԿ–ից հետո երթի մասնակիցները գնալու են Հակակոռուպցիոն կոմիտե, որտեղ ևս բողոք են ներկայացնելու։
Շաբաթ օրը՝ հունիսի 18-ին, ժամը 19։00-ին ընդդիմությունը նաև հանրահավաք է անցկացնելու Ֆրանսիայի հրապարակում։
Հիշեցնենք` ՀՀ վարչապետ Նիկոլ Փաշինյանի` Արցախի վերաբերյալ հայտարարությունից հետո Հայաստանում բողոքի ալիք բարձրացավ։
Մայիսի 1-ին Երևանի Ֆրանսիայի հրապարակում մեկնարկեց ընդդիմության բազմահազարանոց հանրահավաքը։ Մասնակիցները վրաններ ու բարիկադներ տեղադրեցին, Իշխան Սաղաթելյանը հայտարարեց, որ մայիսի 2-ից սկսում են անհնազանդության ակցիաներ՝ փակելով փողոցները։
Մայիսի 2-ից սկսած` ամեն օր Երևանում կազմակերպվում են անհնազանդության երթեր ու հանրահավաքներ, այլ միջոցառումներ։
«Դիմադրություն» շարժման անդամ Իշխան Սաղաթելյանը հունիսի 14-ին հայտարարեց, որ վրանային ավանը լիարժեք կատարել է իր գործը, և հունիսի 15-ին վրանները հավաքելու են: Դա, սակայն, ընդդիմադիրի խոսքով, ամենևին էլ պայքարի ավարտ չի նշանակում. գնալու են մինչև վերջ: