Երգեհոնի և սաքսոֆոնի անսպասելի համադրություն. Երևանում նշվել է Ռուսաստանի օրը

ԵՐԵՎԱՆ, 16 հունիսի – Sputnik. Առաջին անգամ հայ հանդիսատեսը հնարավորություն ունեցավ լսելու երկու տարբեր գործիքների՝ երգեհոնի և սաքսոֆոնի սիմբիոզը։

Իսկ տոնական համերգը նվիրված էր Ռուսաստանի օրվան, որտեղ վիրտուոզ կատարումներով ներկայացան հայտնի երաժիշտներ, բազմաթիվ մրցույթների դափնեկիրներ Հիրոկո Ինոուեն (երգեհոն, Ճապոնիա) և Վերոնիկա Կոժուխարովան (սաքսոֆոն, ՌԴ)։

Վերոնիկա Կոժուխարովան կարծում է, որ համարձակորեն կարելի է համադրել այն, ինչ թվում է անհամադրելի է։ «Ինձ համար մեծ պատիվ է ելույթ ունենալ Հայաստանում և նման կարևոր տոնի»,- նշել է նա։

Ճապոնացի երգեհոնահարուհի, միջազգային մրցույթների դափնեկիր Հիրոկո Ինոուեն ակադեմիական կատարողների նոր սերնդի վառ ներկայացուցիչ է, որի երգացանկը առանձնանում է ժանրային բազմազանությամբ։

«Ռուսաստանն ինձ համար երկրորդ հայրենիք է։ Իմ ստեղծագործական գործունեությունը սերտ կապված է Ռուսաստանի հետ։ Ուրախ եմ մասնակցելու այս կարևոր օրվա առթիվ կազմակերպված համերգին։ Առաջին անգամ եմ Հայաստանում և հիացած եմ մարդկանց բարությամբ, անկեղծությամբ, հիացած եմ երկրի բնությամբ»,- ասել է Հիրոկո Ինոուեն։

Միջոցառմանը ներկա Հայաստանում ՌԴ արտակարգ և լիազոր դեսպան Սերգեյ Կոպիրկինը շնորհակալություն է հայտնել Երևանում «Դոմ Մոսկվի» կենտրոնին և Կամերային երաժշտության տան ղեկավարությանն՝ այս հրաշալի երեկոյի համար։

«Անսպասելի դուետ՝ երգեհոնի և սաքսոֆոնի վիրտուոզ կատարումներ։ Շատ կարևոր է, որ երգացանկում ներառված էին Ռուսաստանի, Հայաստանի, Խորհրդային Միության, համաշխարհային երաժշտության դասականների ստեղծագործությունները։ Ուրախ եմ, որ այս համերգը նվիրված էր իմ հայրենիքի տոնին»,- նշել է դեսպան Կոպիրկինը։

Երեկոյի ընթացքում հնչել են Բախի, Բաբաջանյանի, Թարիվերդիևի, Չայկովսկու, Դոգայի, Ազնավուրի, Սպենդիարյանի, Խաչատրյանի և այլ կոմպոզիտորների ստեղծագործություններ։

«Ռուսաստանի օրվան նվիրված համերգի ծրագիրը և երգացանկը քննարկելիս` որոշեցինք հայ հանդիսատեսին անսովոր բան ցույց տալ՝ երգեհոնի և սաքսոֆոնի համադրությունը։ Երևանում Ռուսաստանի օրվա տոնակատարությունը հայ և ռուս ժողովուրդների դարավոր բարեկամության հերթական վկայությունն է»,- համերգից հետո ասել է Երևանում «Դոմ Մոսկվի» կենտրոնի գլխավոր տնօրեն Վահրամ Կարապետյանը։

Միջոցառմանը ներկա էին ՀՀ ԿԳՄՍ նախարարի տեղակալ Արա Խզմալյանը, Հայաստանում դիվանագիտական առաքելությունների ներկայացուցիչներ, մշակույթի գործիչներ, Հայրենական պատերազմի վետերաններ:

Նշենք, որ համերգը կազմակերպվել էր Երևանում «Դոմ Մոսկվի» մոսկովյան մշակութագործարարական կենտրոնը։ Տոնական համերգի աջակիցներն էին ՀՀ-ում ՌԴ դեսպանությունը, ՀՀ ԿԳՄՍ նախարարությունը, Մոսկվայի իշխանությունները, Մոսկվայի արտաքին տնտեսական միջազգային կապերի դեպարտամենտը, Հայրենակիցների մոսկովյան տունն ու Կամերային երաժշտության տունը։