ԵՐԵՎԱՆ, 16 հունիսի – Sputnik. Եվրասիական տնտեսական միության (ԵԱՏՄ) երկրները կարող են ապահովել իրենց պարենային անվտանգությունը։ ՏԱՍՍ-ի հաղորդմամբ՝ տեղեկությունը հայտնել է Ռուսաստանի Դաշնության կառավարության փոխնախագահ Ալեքսեյ Օվերչուկը Պետերբուրգի տնտեսական համաժողովի շրջանակում «Գործընկերություններ Եվրասիայում. նոր հնարավորություններ» նստաշրջանում։
«ԵԱՏՄ-ում մենք մեզ պաշտպանում ենք, ու մեր գործընկերներին առաջարկում ենք գյուղատնտեսական արտադրանքի հիմնական տեսակների, ցորենի ու արևածաղկի ձեթի ընդհանուր հաշվեկշիռներ ունենալ։ Հստակ հասկանալու համար, որ մենք կկարողանանք մեր պետությունների քաղաքացիներին երաշխավորված կերպով ապահովել սննդամթերքով»,- ասել է նա։
Օվերչուկն ավելացրել է, որ հաշվի առնելով Ռուսաստանի, Ղազախստանի, Հայաստանի, Ղրղզստանի ունեցած ներուժը՝ դա միանգամայն հնարավոր է անել սեփական տարածքում։
«Դրա համար կպահանջվի ջանքերի ավելի սերտ համակարգում, ավելի սերտ ինտեգրում, բայց ի վերջո բոլորս կշահենք դրանից։ Հենց նման աշխատանք ենք իրականացնում մեր հարթակում»,- նշել է փոխվարչապետը։
Ուկրաինայի շուրջ ստեղծված իրավիճակը և ԱՄՆ-ի ու Եվրամիության կողմից Ռուսաստանի դեմ սահմանված լայնածավալ պատժամիջոցները հանգեցրել են հացահատիկի մատակարարման խախտման, ինչը բարձրացրել է աշխարհի մի շարք երկրներում պարենային ճգնաժամի վտանգը: Տարեսկզբից ցորենի ու եգիպտացորենի գները զգալիորեն աճել են։
ՌԴ արտգործնախարար Սերգեյ Լավրովն ավելի վաղ հայտարարել էր, որ աշխարհում պարենային ճգնաժամը սկսվել է Ուկրաինայում հատուկ ռազմական գործողությունից շատ առաջ, դրա պատճառներն էին կորոնավիրուսի համավարակն ու արևմտյան երկրների սխալ հաշվարկները: Միաժամանակ, Լավրովն ավելացրել է, որ ներկայիս իրավիճակը բարդացրել է խնդիրը, իսկ արևմտյան պատժամիջոցները դարձել են պարենի մատակարարումների խախտման հիմնական պատճառներից մեկը: