ԵՐԵՎԱՆ, 15 հունիսի – Sputnik. ՆԱՏՕ-ին միանալու հարցում Շվեդիայից ու Ֆինլանդիայից հնչած պատասխանները չեն համապատասխանում թուրքական կողմի ակնկալիքներին ու անընդունելի են։ Այս մասին հայտարարել է Թուրքիայի արտգործնախարար Մևլութ Չավուշօղլուն, հայտնում է Անադոլու գործակալությունը։
«Մենք համապատասխան փաստաթղթեր ենք ուղարկել և՛ ՆԱՏՕ-ին, և՛ երկու երկրներին: Մեր ստացած փաստաթղթերը հեռու են մեր սպասելիքներից: Մենք նոր պահանջներ ենք ուղարկել, սպասում ենք նրանց պատասխանին: Գնդակն այժմ նրանց դաշտում է»,- ասել է նախարարը։
Ավելի վաղ հայտնի էր դարձել, որ Թուրքիան հրաժարվել է Ֆինլանդիայի և Շվեդիայի հետ եռակողմ բանակցություններ վարել ՆԱՏՕ-ին այդ երկրների անդամակցության շուրջ։ Այդ բանակցություններում նախատեսվում էր գտնել այնպիսի լուծում, որը Անկարային թույլ կտա հաստատել երկրների կողմից դաշինքին միանալու դիմումները։
Անկարան պնդում է, որ Ստոկհոլմն ու Հելսինկին եռակողմ բանակցությունների շուրջ համաձայնեցնելուց առաջ կոնկրետ առաջարկներ ներկայացնեն Թուրքիայի կողմից բարձրացված ահաբեկչության խնդրի լուծման համար։ Թուրքական կողմն այս բանակցությունների հիմնական պայմաններից է անվանել Ֆինլանդիայի և Շվեդիայի կողմից Քրդստանի աշխատավորական կուսակցության հետ կապերը խզելու կոնկրետ առաջարկների տրամադրումը։
Ֆինլանդիան և Շվեդիան մայիսի 18-ին ուկրաինական իրադարձությունների ֆոնին ՆԱՏՕ-ի գլխավոր քարտուղարին են փոխանցել դաշինքին միանալու հայտ։ Թուրքիան արգելափակել է այս դիմումների վերանայման գործընթացի մեկնարկը։ Նախօրեին Թուրքիայից հայտարարել էին, որ պատրաստ են ավելի քան մեկ տարով հետաձգել Շվեդիայի ու Ֆինլանդիայի անդամակցումը ՆԱՏՕ-ին, քանի դեռ չեն ստացել բավարար երաշխիքներ, որ այդ երկրներն այլևս չեն աջակցի քրդական խմբերին, որոնք Թուրքիայում հռչակված են որպես ահաբեկիչներ։