Մենք ԱԺ կգնանք բացառապես մեր օրակարգով. Արամ Վարդևանյան

ԵՐԵՎԱՆ, 15 հունիսի – Sputnik. Ընդդիմադիրներն Ազգային ժողով կվերադառնան բացառապես իրենց օրակարգով։ Վարդանյանների այգում «Դիմադրություն» շարժման հավաքի ժամանակ այս մասին ասաց շարժման անդամ, «Հայաստան» խմբակցության պատգամավոր Արամ Վարդևանյանը։

Նրա խոսքով` վրանը շարժման գործիքներից մեկն էր, ինչպես ռուպորն է, և շարժման մարտավարությունը չի փոխվել։

Վարդևանյանը մանրամասնեց` Փաշինյանին անվստահություն հայտնելու համար նախ պետք է լրանա նրա պաշտոնավարման մեկ տարին, որից հետո ԱԺ պատգամավորների 1/3-ը պետք է դիմումով հանդես գա և ներկայացնի վարչապետի իր թեկնածուն։ Սակայն, ըստ նրա, այս գործընթացի մասին դեռ վաղ է խոսել, քանի որ մինչև նրա պաշտոնավարման մեկ տարին` օգոստոսի 2-ը, շատ անելիքներ ունեն։ Վարդևանյանը հավելեց` խաղաղ ճանապարհով հասնելու են «առանց Նիկոլ Հայաստան» իրավիճակի։

Հավելենք, որ ընդդիմադիրներն այգուց շարժվեցին դատախազության շենքի մոտ և այժմ այնտեղ են։

Հիշեցնենք` ՀՀ վարչապետ Նիկոլ Փաշինյանի` Արցախի վերաբերյալ հայտարարությունից հետո Հայաստանում բողոքի ալիք բարձրացավ։

Ապրիլի 22-ին ԱԺ փոխխոսնակ, «Հայաստան» խմբակցության անդամ Իշխան Սաղաթելյանն ազդարարեց վարչապետ Նիկոլ Փաշինյանին և նրա թիմին իշխանությունից հեռացնելու փողոցային պայքարի մեկնարկի մասին։

Մայիսի 1-ին Երևանի Ֆրանսիայի հրապարակում մեկնարկեց ընդդիմության բազմահազարանոց հանրահավաքը։ Մասնակիցները վրաններ ու բարիկադներ տեղադրեցին, Իշխան Սաղաթելյանը հայտարարեց, որ մայիսի 2-ից սկսում են անհնազանդության ակցիաներ՝ փակելով փողոցները։

Մայիսի 2-ից սկսած` ամեն օր Երևանում կազմակերպվում են անհնազանդության երթեր ու հանրահավաքներ, այլ միջոցառումներ։

«Դիմադրություն» շարժման անդամ Իշխան Սաղաթելյանը հունիսի 14–ին հայտարարեց, որ վրանային ավանը լիարժեք կատարել է իր գործը և հունիսի 15-ին վրանները հավաքելու են: Դա, սակայն, ընդդիմադիրի խոսքով, ամենևին էլ պայքարի ավարտ չի նշանակում. գնալու են մինչև վերջ:

Այսօր առավոտյան, արդեն, Ֆրանսիայի հրապարակն ազատվել է վրաններից, ավելի քան 40–օրյա ընդմիջումից հետո վերականգնվել է ավտոմեքենաների երթևեկությունը։