ԵՐԵՎԱՆ, 15 հունիսի – Sputnik. Եթե նախկինում ԼՂ բանակցային հայկական հայեցակարգի հիմքում դրվում էր Արցախի կարգավիճակը` դրանից բխեցնելով արցախահայության անվտանգության երաշխիքներն ու իրավունքները, ապա այսօր հիմքում անվտանգության երաշխիքներն ու իրավունքներն են` դրանցից բխեցնելով կարգավիճակը։
Այսօր ԱԺ–ում հայտարարեց ՀՀ վարչապետ Նիկոլ Փաշինյանը` ներկայացնելով ԼՂ կարգավորման բանակցությունների ներկա վիճակը։
«Այլ կերպ ասած` մենք արձանագրում ենք, որ կարգավիճակը տվալ իրադրության մեջ ոչ թե նպատակ է, այլ միջոց` ապահովելու ԼՂ հայության անվտանգությունը, իրավունքներն ու ազատությունները»,– ասաց Փաշինյանը` վստահեցնելով, որ այս ձևակերպումները հասկանալի են միջազգային հանրությանը և ավելի ընկալելի են դարձնում ԼՂ–ի խնդրի էությունն ու ԼՂ–ի հարցում հայկական կողմի նպատակները։
«Բայց կա նաև մի կարևոր արձանագրում` ցանկացած կարգավիճակ, որ իրապես երաշխավորում է ԼՂ հայության անվտանգությունը, իրավունքներն ու ազատությունները, պիտի լուծում համարվի մեզ համար»,– հայտարարեց վարչապետը` շեշտելով, որ պետության համար միակ երաշխիքը այսօրվա աշխարհաքաղաքական իրողություններում համապարփակ խաղաղությունն է։
«Դա այն է, երբ հարևանների հետ հարցերը լուծված են, սահմանները սահմանազատված են ու սահմանագծված, խաղաղությունն էլ` դե յուրե հաստատված»,– ասաց Փաշինյանը` հավելելով, որ Հայաստանն այսօր փորձում է գնալ հենց այդ ճանապարհով, իսկ թե որքանով կստացվի, ըստ Փաշինյանի, ոչ ոք չի կարող հստակ կանխատեսել։
Բայց այն, որ հակառակ ճանապարհը տանում է ոչ միայն ԼՂ–ի, այլև Հայաստանի կործանման, Փաշինյանի համար միանշանակ է ու այդ իսկ պատճառով՝ անթույլատրելի։ Ուստի ՀՀ վարչապետն իր ելույթն ավարտեց ՀՀ ժողովրդին կոչ անելով համախմբվել խաղաղության օրակարգի, հայոց պետականության ու շահերի շուրջ։