ԵՐԵՎԱՆ, 14 հունիսի – Sputnik. Այս պահին գնաճը Հայաստանում 9 տոկոս է, բայց հնարավոր է` ամռան ամիսներին ավելի բարձրանա։ Այսօր լրագրողների հետ հանդիպմանն ասաց ՀՀ ԿԲ նախագահ Մարտին Գալստյանը` խոսելով գնաճի առաջիկա կանխատեսումների մասին։
«Մենք կանխատեսում ենք, որ առաջիկա ամիսներին այս ցուցանիշը կգնա ավելի վերև, թե որքան, ճշգրիտ չեմ կարող ասել, որովհետև այս ամիսները շատ տատանողական են` կապված սպասվող բերքի առատ կամ սակավ լինելու, թանկ կամ էժան լինելու հետ։ Բայց տարին, ըստ էության, կավարտենք 8 տոկոսից ավելի բարձր ցուցանիշով»,- ասաց Գալստյանը։
ԿԲ նախագահը նաև նշեց, որ գնաճը Հայաստանում կարող էր շատ ավելի բարձր լինել, եթե դոլարի փոխարժեքը չնվազեր ու դրամը չարժևորվեր։
Այս հանգամանքը, ըստ ԿԲ ղեկավարի, նպաստեց, որպեսզի միջազգային շուկայում գրանցված բարձր գնաճը նույնությամբ չարտացոլվի ՀՀ–ում։
«Անցած տարվա նույն օրվա համեմատ, օրինակ, ցորենն աշխարհում թանկ է 57 տոկոսով, եգիպտացորենը` 22.5 տոկոսով, սուրճը` մոտ 60 տոկոսով, նավթը` 73.2 տոկոսով,- միջազգային շուկայում առավել թանկացած ապրանքների գները ներկայացրեց ԿԲ նախագահը,- մեր ներքին գները, ըստ էության, նույն չափով չեն աճել։ Այսինքն` փոխարժեքի արժևորումը, այնուամենայնիվ, որոշակի ազդեցություն ունենում է։ Որովհետև ես մամուլում որոշ հրապարակումներ տեսա, որ կուրսը իջել է, ինչու ներմուծվող ապրանքների գները չեն կայունանում։ Պետք է ավելի խորը նայել»։
Հիշեցենք` Կենտրոնական բանկն այսօր որոշել է անփոփոխ թողնել վերաֆինանսավորման տոկոսադրույքը` մարտին սահմանված 9.25%-ի չափով։
Ըստ Գալստյանի` ԿԲ-ն այսկերպ առայժմ ձեռնպահ կմնա դրամավարկային քաղաքականության նկատմամբ որևէ ճնշում կիրառելուց և կհետևի տնտեսության բնականոն գործընթացների զարգացմանը` հարկ եղած դեպքում անհրաժեշտ միջամտություն կատարելու համար։