ԵՐԵՎԱՆ, 11 հունիսի – Sputnik. Հայաստանի հավաքականի գլխավոր մարզիչ Խոակին Կապառոսը վստահ է, որ Ազգերի լիգայի խաղարկության երրորդ տուրում Ուկրաինայի հետ հանդիպման հաշիվը չի համապատասխանում խաղի տրամաբանությանը։ Մարզիչն այդ մասին ասել է խաղից հետո կայացած ասուլիսում։
«Կարծում եմ, որ հանդիպման հաշիվը չի համապատասխանում խաղի տրամաբանությանը, չափազանց մեծ հաշիվ է։ Տղաները մեծ ուժեր ծախսեցին։ Ցավոք, երկու գոլի պարագայում մեր բախտն ուղղակի չբերեց։ Սակայն շատ գոհ եմ տղաների գործադրած ջանքերից», - ասաց Հայաստանի ազգային հավաքականի մարզիչը։
Կապառոսը շեշտեց, որ տասը օրում չորս հանդիպում անցկացնելը բարբարոսություն է, պետք է մտածել ֆուտբոլիստների մասին։
Հիշեցնենք, որ այսօր Ազգերի լիգայի երրորդ տուրում Հայաստանի հավաքականը 0:3 հաշվով պարտվեց Ուկրաինայի թիմին: Հունիսի 4-ին Խոակին Կապառոսի սաները Ազգերի լիգայի ընտրական փուլի առաջին տուրում 1:0 հաշվով հաղթել էին Իռլանդիայի հավաքականին: Երկրորդ տուրում հայ ֆուտբոլիստները 0:2 հաշվով պարտվել էին Շոտլանդիայի թիմին: