ԵՐԵՎԱՆ, 9 հունիսի – Sputnik. Կենտրոնական բանկը կարող է այնպես անել, որ դոլարի փոխարժեքի անկումը հավասարակշռվի։ Լրագրողների հետ ճեպազրույցում այս մասին ասաց ՀՀ էկոնոմիկայի նախարար Վահան Քերոբյանը։
Նա ընդգծեց, որ երկրի ընթացիկ հաշիվը դրական է, ինչը լավ նորություն է։ Այսինքն` երկիր մտնող գումարներն ավելի շատ են, քան երկրից դուրս եկողները։
«Այս պարագայում ԿԲ–ն պետք է նոր գործիքակազմ սկսի կիրառել, թեև այն բավականին լայն է։ Պետք է նաև այլ տեսանկյունից նայել` դրամն ուժեղանում է դոլարի նկատմամբ, բայց դրամ–ռուբլի զույգն այժմ կայուն վիճակում է»,– նշեց Քերոբյանը։
Նախարարի խոսքով` տարբեր սեկտորների տնտեսվարողների, ինչպես նաև ԿԲ գործընկերների հետ պարբերաբար քննարկումներ են անցկացնում. դոլարի փոխարժեքի նվազումը հիմնականում արտահանողներին և ՏՏ ոլորտին է ավելի շատ մտահոգում։
ԱՄՆ դոլարն այսօր վաճառվում է միջինը 419.25 դրամով՝ հունիսի 7-ի համեմատ արժեզրկվելով 3.50 դրամով:
ՀՀ բանկերում դոլարի առքի ամենաբարձր գինը բանկերում 421դրամ է, վաճառքի դեպքում ամենացածրը՝ 427 դրամ: