ԵՐԵՎԱՆ, 9 հունիսի – Sputnik. ՀՀ կառավարությունը հավանություն տվեց «Պաշտպանության մասին» ՀՀ օրենքում և հարակից օրենքներում փոփոխություններ և լրացումներ կատարելու նախագծին։
Պաշտպանության նախարար Սուրեն Պապիկյանը, ներկայացնելով նախագիծը, ասաց, որ ԶՈւ գլխավոր շտաբի պետի պաշտոնը կզբաղեցնի ՀՀ պաշտպանության նախարարի առաջին տեղակալը։
«Այդ անձը պաշտպանության նախարարին փոխարինող չի լինելու։ Այդ կապակցությամբ առանձնահատուկ կարգավորումներ են կատարվում նաև պետական կառավարման համակարգը կանոնակարգող մի շարք այլ օրենքներում»,– նշեց Պապիկյանը։
Նախատեսվում է նոր խմբագրությամբ շարադրել պաշտպանության ոլորտում կառավարության լիազորությունները, խմբագրել և հստակեցնել ՀՀ վարչապետի, ՀՀ պաշտպանության նախարարության և Զինված ուժերի գլխավոր շտաբի ու ՀՀ պաշտպանության նախարարի ու ԶՈւ գլխավոր շտաբի պետի լիազորությունների շրջանակը։
Պապիկյանն ընդգծեց, որ գնումների գործընթացն ու ապահովումն ամբողջությամբ իրականացնելու է ՀՀ պաշտպանության նախարարությունը, և գլխավոր շտաբն այլևս չի զբաղվելու այդ հարցով։ Նրա խոսքով` ԶՈւ–ն պետք է զբաղվի միայն իրեն վերապահված գործով` պաշտպանել ՀՀ սահմանները, զբաղվել մարտական պատրաստականությամբ։
Հիշեցնենք` 2022թ–ի փետրվարի 24-ին Արտակ Դավթյանը երկրորդ անգամ ազատվեց ԳՇ պետի պաշտոնից, և արդեն երեքուկես ամիս է` կառույցը ղեկավար չունի։ Դավթյանն այդ պաշտոնին էր նշանակվել էր 2021-ի մարտի 22-ին՝ փոխարինելով Օնիկ Գասպարյանին։ Մինչ այդ նա ԳՇ պետի պաշտոնը զբաղեցրել էր նաև 2018-ի մայիս-2020-ի հունիս ժամանակահատվածում։