ԵՐԵՎԱՆ, 8 հունիսի – Sputnik. Կիևի կողմից հնչող հայտարարությունները ստուգման կարիք ունեն։ Այս մասին հայտարարել է ՌԴ ԱԳՆ պաշտոնական ներկայացուցիչ Մարիա Զախարովան` մեկնաբանելով ՌԴ նախագահ Վլադիմիր Պուտինի հետ հնարավոր բանակցությունների վերաբերյալ Վլադիմիր Զելենսկու հայտարարությունը։
«Բոլոր այդ հայտարարությունները պետք է մանրակրկիտ ստուգվեն, ճշտվեն», – Sputnik ռադիոկայանի եթերում ասել է Զախարովան։
Նա նշել է, որ ընդհանուր առմամբ Զելենսկու խոսքերը գնահատելիս, կարելի է ասել, որ դրանք «ակնհայտորեն որևէ մեկի կողմից գրված տեքստեր են, որևէ մեկի գրված ծրագիրը»։
Փետրվարի 24-ին, ի պատասխան Դոնբասի հանրապետությունների ղեկավարների օգնության մասին խնդրանքին, ՌԴ նախագահ Վլադիմիր Պուտինը հայտարարեց Ուկրաինայում ռազմական հատուկ գործողություններ անցկացնելու մասին։ Նա ընդգծեց, որ Մոսկվան չի ծրագրում օկուպացնել Ուկրաինայի տարածքները, այն նպատակ ունի երկրում ապառազմականացում և ապազգայնացում իրականացնել։ Ի պատասխան ԱՄՆ–ն իր դաշնակիցների հետ ՌԴ–ի նկատմամբ մեծածավալ պատժամիջոցներ կիրառեցին և սկսեցին Կիևին զենք մատակարարել։
Փետրվարի 28-ից ռուս–ուկրաինական բանակցություններ են ընթանում, Մոսկվայի պատվիրակությունը գլխավորում է ՌԴ նախագահի օգնական Վլադիմիր Մեդինսկին։ Մի քանի հանդիպում կայացել է Բելառուսում, այնուհետև կողմերը շարունակել են շփվել տեսակապի միջոցով։
Մարտի 29-ին Ստամբուլում անցկացվեց բանակցությունների հերթական փուլը։ Ապրիլի 12-ին ՌԴ նախագահ Վլադիմիր Պուտինը լրագրողներին հայտարարեց, որ Կիևը, մոռանալով Թուրքիայում ձեռք բերված պայմանավորվածությունները, գործընթացը փակուղի է մտցրել։
Ապրիլի 20-ին ՌԴ նախագահի մամուլի քարտուղար Դմիտրի Պեսկովը հայտարարեց, որ Մոսկվան Կիևին հստակ ձևակերպումներով փաստաթղթերի նախագիծ է փոխանցել և այժմ պատասխանի է սպասում։