ԵՐԵՎԱՆ, 8 հունիսի – Sputnik. Հունգարիան չի միանա այն պատժամիջոցներին, որոնք վտանգի տակ են դնում գազի մատակարարումը։ Խորհրդարանի նիստում այս հայտարարությունն է արել Հունգարիայի արտգործնախարար Պետեր Սիյարտոն։
«Եթե չկարողանայինք խողովակաշարով մատակարարվող գազի համար բացառություն ստանալ, Հունգարիայում վառելիքն անմիջապես կթանկանար 55-60%–ով։ Մենք դա թույլ չտվեցինք, պայքարեցինք հանուն մեր ճշմարտության։ Ապագայում ևս այդպես է լինելու, և հիմա դա ենք ուզում հասկացնել. Հունգարիան չի միանա այնպիսի պատժամիջոցի, որը վտանգի տակ կդնի գազի մատակարարումը», – ասել է նա։
Նախարարի խոսքով` երբ Հունգարիան հայտարարել է, որ պատրաստ է միանալ ռուսական նավթի մատակարարման էմբարգոյին, եթե բացառություն արվի խողովակաշարով եկող մատակարարումների համար, նրա վրա փորձել են ճնշում գործադրել ինչպես արտասահմանից, այնպես էլ երկրի ներսում, որպեսզի Բուդապեշտը հրաժարվի իր դիրքորոշումից։
Ավելի վաղ ԵՄ–ն պաշտոնական ամսագրում հրապարակել էր ՌԴ–ի նկատմամբ պատժամիջոցների 6-րդ փաթեթը, որով ռուսական նավթի ներմուծման մասնակի արգելք է նախատեսվում: ՌԴ–ից նավթի և նավթամթերքի արտահանման արգելքն առայժմ կտարածվի միայն ծովային մատակարարումների վրա։
ՌԴ նախագահ Վլադիմիր Պուտինը հայտարարել էր, որ Ռուսաստանի զսպման և թուլացման քաղաքականությունը Արևմուտքի երկարաժամկետ ռազմավարությունն է, իսկ պատժամիջոցները լուրջ հարված են հասցրել ամբողջ աշխարհի տնտեսությանը։ Պուտինը հայտարարել էր նաև, որ ԱՄՆ–ն և ԵՄ–ն ՌԴ–ի նկատմամբ պարտավորությունների փաստացի դեֆոլտ են հայտարարել` սառեցնելով նրա արժութային պահուստները։