ԵՐԵՎԱՆ, 8 հունիսի – Sputnik. Հայաստանում համայնքների խոշորացման գործընթացի արդյունքում համայնքային ապարատներում կրճատվել է 1531 հաստիք` 7 046-ից հասցվելով 5 514-ի։
Այս մասին այսօր ԱԺ–ում համայնքների խոշորացման նոր փուլի քննարկմանը նվիրված լսումների ժամանակ հայտնեց ՏԿԵ նախարարի տեղակալ Վաչե Տերտերյանը։
«Բայց ես ուրիշ թիվ եմ ուզում հնչեցնել, որը շատ ավելի կարևոր է. համայնքային ծառայություններ իրականացնող ոչ առևտրային կազմակերպություններում` մանկապարտեզներում, կոմունալ ծառայություններում, նախադպրոցական դաստիարակության կենտրոններում ու էլի շատ համայնքային ծառայություննրում 10 342 հաստիքի փոխարեն ունենք 12 623 հաստիք»,- ասաց Տերտերյանը։
Թե ինչ փոփոխությունների կհանգեցնի առաջարկվող նոր խոշորացումը, նախարարությունում դեռևս հաշվարկներ չունեն։ Դա պարզ կլինի միայն գործընթացի ավարտից հետո։
Մտահոգությանը, թե համայնքների խոշորացմամբ գյուղացին ամեն անգամ խնդիր է ունենում համայնքապետարան հասնելու կամ որևէ փաստաթուղթ վերցնելու դեպքում, Վաչե Տերտերյանն այսպես արձագանքեց.
«Գյուղացին ինչքան քիչ շփվի տեղական ինքնակառավարման մարմինների հետ, այնքան լավ։ Դա կնշանակի, որ խնդիրները լուծել ենք։ Մենք պիտի այդ կարգի շփումները վերացնենք»։
Տերտերյանը վստահեցրեց, որ տեղեկանք վերցնելու կամ գյուղապետին տեսնելու խնդիր այսօր խոշորացված համայնքների բնակիչները չունեն։
Հիշեցնենք` ՀՀ կառավարույթունը ՀՀ «Վարչատարածքային բաժանման մասին» օրենքում փոփոխություններ կատարելու նոր նախագիծ է ներկայացրել ԱԺ, որը կքննարկվի հունիսի 9-ին, ժամը 11։00-ին կառավարության նախաձեռնությամբ գումարվելիք արտահերթ նիստում։
Նոր նախագծով առաջարկվում է ՀՀ արդեն խոշորացված 13 համայնքները միավորել ևս 141 գյուղերի ու քաղաքների հետ` ձևավորվելով 5 նոր խոշորացված համայնքներ։
Նախատեսվում է ՀՀ Արագածոտնի մարզի Թալին համայնքում ներառել հարակից 34 գյուղերը, Գեղարքունիքի մարզի Ճամբարակ համայնքում` հարակից 19 գյուղերը, Լոռու մարզի Ալավերդի համայնքում` Ալավերդի քաղաքն ու հարկից 27 գյուղերը, Տաշիր համայնքում` Տաշիր քաղաքն ու հարակից 23 գյուղերը, Սյունիքի մարզի Սիսիան համայնքում` Սիսիան քաղաքն ու տարածքի 35 գյուղերը։
Խոշորացված համայնքների վերջնական ձևավորումը նախատեսված է իրականացնել 2022թ-ի սեպտեմբերի 25-ին այդ համայնքներում նախատեսված ՏԻՄ ընտրություններով, քանի որ այդ համանքների գործող ղեկավարների պաշտոնավարման ժամկետներն ավարտվում են այս տարվա նոյեմբերին։