ԵՐԵՎԱՆ, 7 հունիսի – Sputnik. Սահմանային պետական վերահսկողության շրջանակում ուսումնասիրվում են Վերին Լարսում օրեր շարունակ կանգնած բեռնատարների ապրանքատեսակների պահման պայմանները, ինչպես նաև պիտանելիության ժամկետները։ Sputnik Արմենիայի հետ զրույցում տեղեկությունը հայտնեց ՍԱՏՄ սննդամթերքի անվտանգության վարչության պետ Վահե Դանիելյանը։
Նշենք, որ շուրջ 1 ամիս է` բեռնատարների վարորդները Վրաստան-Ռուսաստան սահմանին են և չեն կարողանում շարունակել ճանապարհը կամ վերադառնալ։ Խնդիրը կապված է ռուսական կողմի անցակետի թողունակության հետ։
«Սննդամթերքի անվտանգության մասին օրենքով հստակ սահմանված է, թե որ դեպքերում է արգելվում ապրանքի մուտքը ՀՀ։ Մինչև 30 օր պիտանելիության ժամկետ ունեցող ապրանքների ժամկետի 2/3-ից պակաս լինելու դեպքում արգելվում է դրանց ներմուծումը ՀՀ։ Արդեն իսկ մեր կողմից իրականացվում է այդ աշխատանքները, և եթե արտադրանքը որևէ խնդիր կունենա անվտանգության հետ կապված, դրա մուտքը ՀՀ կարգելվի»,–ասաց Դանիելյանը։
Նրա խոսքով` այս պահին նման դեպք չի գրանցվել, երբ որևէ ապրանքի ներմուծումը չեղարկվի։ Դանիելյանը հայտնեց` նախորդ տարի եղել է դեպք, երբ պտուղ-բանջարեղենը մնացել է Լարսում, և ոչ պիտանի դարձածները ՀՀ ներմուծվելուց հետո ոչնչացվել են։
Ինչ վերաբերում է նման դեպքերում ներմուծողներին փոխհատուցելու հարցին, ապա Դանիելյանը նշեց` դա իրենց տիրույթում չէ։
Հիշեցնենք, որ ՀՀ էկոնոմիկայի նախարար Վահան Քերոբյանը հայտնել էր` հունիսի 11-ին Լարսի անցակետում հանդիպելու է ՌԴ տնտեսական զարգացման նախարար Մաքսիմ Ռեշետնիկովի հետ, որպեսզի միասին հասկանան, թե Վերին Լարսի թողունակությունն ավելի արագացնելու ինչ հնարավորություններ ունեն: Հանդիպմանը ներկա են լինելու նաև ռուսական մաքսային և ճանապարհային ծառայությունների ներկայացուցիչներ։