ԵՐԵՎԱՆ, 6 հունիսի – Sputnik. Թեհրանը վերջին մի քանի ամսվա ընթացքում ակտիվորեն ընդլայնում է էներգետիկ համագործակցությունը Բաքվի և Աշխաբադի հետ, կարևոր համաձայնագրերից մեկը դարձավ իրանական գազատարով Թուրքմենստանից Ադրբեջան տեղափոխվող գազի ծավալի կրկնապատկումը։ Այս մասին հայտնում է ՌԻԱ Նովոստին` հղում անելով IRNA գործակալությանը։
Հունիսի 3-ին Իրանի նավթի նախարար Ջավադ Օուջին պաշտոնական այցով Բաքու էր այցելել , որտեղ բանակցություններ էր ունեցել Ադրբեջանի էկոնոմիկայի նախարար Միքայիլ Ջաբարովի հետ։ Արդյունքում` էներգետիկայի, նավթի, գազի, տրանսպորտի և առևտրի ոլորտներին առնչվող մի շարք փաստաթղթեր էին ստորագրվել։
Գործակալությունը նշում է, որ նաև հուշագիր է ստորագրվել իրանական գազատարով Թուրքմենստանից Ադրբեջան գնացող գազի ծավալի կրկնապատկման վերաբերյալ։
IRNA–ն ընդգծում է, որ «գազի առևտուրը Իրանի համար տնտեսական այդ հատվածում ակտիվանալու միջոց է դարձել»։ Այդ նպատակով Թեհրանը սվոպեր է օգտագործել և մինչ այսօր կարողացել է վերականգնել Իրանի տարածքով դեպի Ադրբեջան թուրքմենական գազի փոխանակման պայմանագիրը։
Նախագահ Իբրահիմ Ռաիսիի օրոք Իրանի արտաքին քաղաքականության գլխավոր ուղղվածություններից մեկը դարձավ էներգետիկ դիվանագիտությունը։ Այդ շրջանակում Թեհրանը վերջին ամիսներին ակտիվորեն ընդլայնում էր Թուրքմենստանի հետ գազային համագործակցությունը։ Դրա հետ մեկտեղ Իրանն ակտիվորեն զարգացնում էր էներգետիկ կապերը Ադրբեջանի հետ։ Այսպես, դեռ 2021 թվականի նոյեմբերին Իրանի նավթի նախարարը բանակցություններ էր ունեցել Ադրբեջանի փոխվարչապետ Շահին Մուստաֆաևի հետ, որի ընթացքում համաձայնագիր էր ստորագրվել հարևան երկրներից դեպի Ադրբեջան գազի մատակարարման վերաբերյալ. այդ երկրների ցանկում էր նաև Թուրքմենստանը։
Նույն ամսում բանակցություններ կայացան նաև Աշխաբադի հետ, ու արդյունքում գազի փոխանակման վերաբերյալ փաստաթղթեր ստորագրվեցին։