ԵՐԵՎԱՆ, 5 հունիսի – Sputnik․ Ալբանիայի մայրաքաղաք Տիրանայում ավարտվեց Եվրոպայի ծանրամարտի առաջնությունը։ Այսօր գերծանր քաշային կարգում Հայաստանը ներկայացնող գյումրեցի երկու մարզիկները նվաճեցին արծաթե և բրոնզե մեդալներ։ երկամարտի 462 կգ արդյունքով՝ 7-րդ անգամ Եվրոպայի չեմպիոն հռչակվեց վրացի Լաշա Տալախաձեն։
+109 կգ քաշայինների պայքարում աշխարհի փոխչեմպիոն, 22-ամյա Վարազդատ Լալայանը նվաճեց երկամարտի արծաթը (451 կգ), իսկ օլիմպիական փոխչեմպիոն Գոռ Մինասյանը՝ բրոնզե մեդալը (446 կգ)։
Լալայանը պոկում վարժությունում 211 կգ-ով գրավեց երկրորդ տեղը։ Հրում վարժությունում նա առաջին փորձի ժամանակ 240 կգ-ով գրավեց երկրորդ տեղը։ 252 կգ-ը բարձրացնել նա չկարողացավ։ 25-ամյա Գոռ Մինասյանը պոկում վարժությունում երրորդն էր՝ 210 կգ-ով։ Գոռ Մինասյանը 236 կգ-ով գրավեց չորրորդ տեղը։
Անգերազանցելի էր աշխարհի հնգակի չեմպիոն, Օլիմպիական խաղերի կրկնակի չեմպիոն Լաշա Տալախաձեն՝ 217 կգ։ Լաշա Տալախաձեն երկրորդ վարժությունում հաղթեց 245 կգ-ով՝ կատարելով միայն առաջին մոտեցումը։
Նշենք, որ Հայաստանի ծանրամարտի հավաքականն այս մրցաշարում ունի 2 չեմպիոն և 3 փոխչեմպիոն։ Ալբանիայի մայրաքաղաք Տիրանայում ծանրամարտիկներ Ռաֆիկ Հարությունյանն ու Դավիթ Հովհաննիսյանը Եվրոպայի չեմպիոններ դարձան։ Իսկ Սամվել Գասպարյանը, Արա Աղայանը և Վարազդատ Լալայանը` փոխչեմպիոն։