Երազել, չհանձնվել. մարիուպոլցի երեխաները հանդիպել են տիեզերագնացի, այցելել Կարմիր հրապարակ

Էքսկուրսիաներ, տեսահոլովակի նկարահանում, այցելություններ թանգարան և հանդիպումներ հայտնիների հետ։ Դոնբասից Մոսկվա եկած երեխաները հանգստյան օրերին մասնակցել են Երեխայի համաշխարհային օրվան նվիրված ակցիային։ Մանրամասները՝ Sputnik-ի հոդվածում։

Հատուկ Մարիուպոլից եկած երեխաների, ինչպես նաև նրանց Մոսկվայում բնակվող բազմազգ հասակակիցների համար Ռուսաստանի Ժողովուրդների տունը խոշոր մշակութային ծրագիր էր կազմակերպել։

Առաջին հարթակը, որն այցելեցին ակցիայի պատանի մասնակիցները, ВДНХ համալիրն է եղել։ Այստեղ՝ Ժողովուրդերի բարեկամության շատրվանի մոտ, երեխաները տեսահոլովակ նկարահանեցին։

Տարբեր լեզուներով՝ հայերեն, մոլդավերեն, ղազախերեն, ուկրաիներեն, լիտվերեն, ռուսերեն տեսաողջույն են ձայնագրել Սիրիայի իրենց հասակակիցների համար։ Այնուհետև էքսկուրսիան շարունակվել է «Տիեզերագնացություն և ավիացիա» տաղավարում։

Թե ինչ կա այնտեղ՝ երկնքում, Երկրի սահմաններից դուրս, երեխաներին պատմել է ԽՍՀՄ և ՌԴ հերոս, հռչակավոր օդաչու-տիեզերագնաց Սերգեյ Կրիկալյովը։ Թանգարանում մեծ էքսկուրսիայի ժամանակ երեխաներին նա մաղթել է «շատ երազել, երբեք չհանձնվել, և կյանքում միայն առաջ շարժվել»։

Տասներկուամյա Վիկա Կոնստանտինովան ակցիային մասնակցող 8 մարիուպոլցի երեխաներից է։ Ասում է՝ Ռուսաստանի մայրաքաղաքից զարմանալի տպավորություններ ունի, բառերով անհնար է պատմել։

«Ես վաղուց էի երազում լինել Կարմիր հրապարակում։ Ամեն ինչ միայն հեռուստացույցով էի տեսել։ Չէի սպասում, որ այն այսքան գեղեցիկ է, և այստեղ այնքա՜ն շատ մարդ կա»- Sputnik-ին պատմել է աղջնակը։

Մոսկվայում էքսկուրսիայի ժամանակ Վիկային մայրն էր ուղեկցում։ Նրանք Մարիուպոլից Ռուսաստան են եկել մի քանի շաբաթ առաջ, երբ հնարավորություն է եղել։ Ապրում են Մերձմոսկվայում՝ առողջարանում։

«Շատ ուրախ ենք։ Մարիուպոլից ենք եկել՝ պատերազմից, ավերածությունից։ Մեզ Ռուսաստանում լավ են դիմավորել։ Ոչ մի բանի կարիք չունենք, անչափ շնորհակալ ենք»,-ասում է Աննա Կոնստանինովան։

Մշակութային ծրագրի գագաթնակետը Կարմիր հրապարակում գրքի փառատոնն էր։ Երեխաների հետ շփվել է հայտնի ռուս գրող Պլեգ Ռոյը։ Նա պատանի ընթերցողներին ներկայացրել է իր ստեղծագործությունների հիման վրա նկարահանված մուլտֆիլմը։ Օլեգ Ռոյը շնորհակալություն է հայտնել ռուս զինծառայողներին, որոնք այսօր կատարում են իրենց պարտքը Դոնբասում․«Շնորհակալ ենք մեր զինվորներին, մենք հավատում ենք նրանց և սպասում, թե երբ նրանք կվերադառնան հաղթանակով»։

Ողջույնի խոսքով երեխաներին և նրանց ծնողներին է դիմել նաև ՌԴ Պետական դումայի պատգամավոր Բիյսուլթան Համզաևը:

«Շատ խորհրդանշական է, որ այս հանդիպումը տեղի է ունենում Մոսկվայի Կարմիր հրապարակում։ Երկրի սրտում: Ռուսաստանը միշտ պաշտպանել և օգնել է նրանց, ովքեր նրա օգնության կարիքն ունեն»,- նշել է ՌԴ Պետդումայի պատգամավորը։

Իսկ միջոցառման ավարտին գրող Օլեգ Ռոյը ևս մեկ անգամ շնորհավորել է երեխաներին տոնի առթիվ, քաղցրավենիք, գրքեր նվիրել նրանց: